زایەڵە - د نەرمین مەعروف غەفور ئەندامی پەرلەمانی عێراق بە زایەڵەی ڕاگەیاند، لە بەردەوامی بەدواداچوون و چاودێری پەرلەمانی بۆ جێبەجێکردنی یاسای ئاسایشی خۆراک رۆژی دووشەممە بەرواری ٢٠٢٢/٩/١٢، سەردانی وەزارەتی تەندروستی حکومەتی فیدڕاڵیمان کرد و لەلایەن بەڕێز د. هاني العقابي وەزیری تەندروستییەوە پێشوازیمان لێکرا .
وتیشی، مەبەستی سەرەکی سەردانەکە بەدواداچوون بوو بۆ زانینی رێکارەکانی وەزارەت لە جێبەجێکردنی بڕگەی ١٧ لە خشتەی ژمارە ب لە هاوپێچی یاسای ئاسایشی خۆراک کە تایبەتە بە تەرخانکردنی بڕی ١٥٠ ملیار دینار بۆ دابینکردنی دەرمان بۆ چارەسەری نەخۆشانی شێرپەنجە ، و پشکی نەخۆشخانەکانی هەرێم وەک نەخۆشخانەی هیوا و نانەکەلی لەو بڕە پارەیە .
ڕونیشیکردەوە، لەبەشێکی کەی سەردانەکە گفتوگۆکرا دەربارەی گرنگی هاریکاری نێوان هەردوو وەزارەتی تەندروستی هەرێم و فیدڕاڵ لەبواری تەندروستی و دابینکردنی دەرمان و پێداویستیی پزیشکی بۆنەخۆشخانەکانی هەرێم لەسەر بودجەی وەزارەتی تەندروستی فیدڕاڵ .. وە بەسوپاسەوە وەزیری تەندروستی ئامادەیی وەزارەتەکەی دووپاتکردەوە بۆ هەموو جۆرە هاوکارییەک لەو بوارە.
ئامادەکردنی- کامەران کەریم

یەکەم کەس بە بۆ ناردنی تێبینی.

پەرلەمانتارێک بۆ زایەڵە: بەدواداچوون بۆ پشکی هەرێم لە پارەی دەرمانی شێرپەنجە دەکەین