"نێچیرڤان بارزانی" سەرۆکی هەرێمی کوردستان بە سەرۆکایەتی شاندێکی باڵا گەیشتە تاران و لە لایەن دکتۆر کازمی نێردراویی تایبەتی سەرۆک کۆماری ئێران و موهەندیس "حەسەن دانایی فەڕ" باڵیۆزی پێشووی ئێران لە وڵاتی عێراق پێشوازیی لێکرا.
بەپێی ڕاپۆرتی زایەڵە، "نێچیرڤان بارزانی" سەرۆکی هەرێمی کوردستان، ئەمڕۆ پێنجشەمە 5ی ئۆگۆستی 2021 بە سەرۆکایەتی شاندێکی باڵای حکومەتی هەرێمی کوردستان، بۆ بەشداریی لە ڕێوڕەسمی سوێندخواردنی سەید "ئیبڕاهیم ڕەئیسی" هەشتەمین سەرۆک کۆماری ئیسلامی ئێران؛ لەسەر بانگهێشتێکی فەرمی بەرپرسانی ئێرانی لە ڕێگای پاڤیۆنی جومهوری فڕۆکەخانەی نێودەوڵەتی مێهرئابادی شاری تاران گەیشتنە پێتەختی وڵاتی ئێران و لە لایەن دکتۆر کازمی نێردراویی تایبەتی سەرۆک کۆماری ئێران و موهەندیس "حەسن دانایی فەڕ" باڵیۆزی پێشووی ئێران لە وڵاتی عێراق پێشوازیی گەرمیان لێکرا.
له ڕێوڕه‌سمی پێشوازیی سەرۆکی هەرێمی کوردستان، هه‌ندێک له به‌رپرسانی ئێرانی و هه‌روه‌ها "فەوزی حەریری" سەرۆکی دیوانی سەرۆکایەتی هەرێمی کوردستان، "نازم دەباغ" نوێنەری حکومەتی هەرێمی کوردستان لە ئێران، "سەلام عارف روشدی" جێگری نوێنەری حکومەتی هەرێمی کوردستان لە تاران و "عەبدوڵڵا ئاکرەیی" بەڕێوەبەریی گشتیی پەیوەندییەکانی نێوان حکومەتی هەرێمی کوردستان و کۆماری ئیسلامی ئێران ئاماده‌بوون.
"نێچیرڤان بارزانی" بڕیار وایه لەم سەردانە فه‌رمییه‌دا لەگەڵ هەندێک لە بەرپرسانی باڵای ئێران و وڵاتانی دیکەی جیهان، دیدار و چاوپێکەوتن ئه‌نجام بدات.
سەید "ئیبڕاهیم ڕەئیسی" ئەمڕۆ پێنجشەمە 5ی ئۆگۆستی 202 وەکوو هەشتەمین سەرۆک کۆماری ئیسلامی ئێران، بە ئامادەبوونی 115 بەرپرسی فەرمی لە 73 وڵاتی جۆراوجۆری جیهان ئامادەدەبن کە بریتین لە: 10 کەسایەتی لە سەرۆکی وڵاتان، 20 سەرۆکی پەرلەمان، 11 وەزیری دەرەوە، 10 وەزیری دیکە، نێردراوی سەرۆکی دەوڵەتەکان، نوێنەرانی سەرۆکی پەرلەمانەکان، شاندەکانی پەرلەمان، بەرپرسان و هەورەها نوێنەرانی 11 ڕێکخراوەی نێودەوڵەتی و ناوچەیی لە پەرلەمانی ئەم وڵاتە سوێندی یاسایی خوارد.