"عه‌باس غه‌زالی" که‌سایه‌تی چالاکی فه‌رهه‌نگی و نوێنه‌ری پێشووی په‌ڕله‌مانی هه‌رێمی کوردستان؛ به بۆنه‌ی کۆچی دوایی شاعیری بەتوانا و ناوداری کورد "پەرتەو کرماشانی" په‌یامێکی ئاراسته کرد.

بەپێی ڕاپۆرتی زایەڵە، "عه‌باس غه‌زالی" که‌سایه‌تی چالاکی فه‌رهه‌نگی و ئه‌ندامی به‌رچاو و ڕاوێژکاری فه‌رهه‌نگی و هونه‌ری پارتی دیموکڕاتی کوردستانی عێراق و نوێنه‌ری پێشووی په‌ڕله‌مانی هه‌رێمی کوردستان؛‌ کاندیدکردنی پاوە لە وتارێکدا بە بۆنەی کۆچی دوایی شاعیری بەتوانا و ناوداری کورد "پەرتەو کرماشانی" نووسیوییه‌تی: ڕاستە "پەرتەو" جێی‌هێشتووین و ئەستێرەیەک لە ئاسمانی کرماشان و ئیلامی سەربەرز ڕاخوشیوە، بەڵام ناوی ئەم کەڵە شاعیرە لە کەلام و مۆسیقای ئێوارانەی کرماشان و لە لەرینەوەی ئاوی تاق وەسان و لە ئاوازی تیشەی فەرهادی بێستوونی عاشقانی ئەم سەرزەمینە دێرینەدا دەمێنێتەوە و بەگوێرەی ئاڵای هونەر و جوانی، بە سەر چیا سەرکەشەکانی شاهۆ و داڵاهۆدا دەشەکێتەوە.

ده‌قی ته‌واویی په‌یامه‌که‌ی "عه‌باس غه‌زالی" له خواره‌دا هاتووه: 

"یادێک و وەفایەک"

بە بۆنەی کۆچی دوایی شاعیری بەتوانا و ناوداری کورد "پەرتەو کرماشانی"

هەرچەند پێشتر ناو و ناوبانگی "پەرتەو کرماشانی"م بیستبوو، بەڵام لە کونگرەی ناودارانی کورد لە سنە زیاتر لەگەڵ ئەو ناوە ئاشنا بووم. ئاشنابوونەکەم لەگەڵ ئەو شاعیرە مەزنە زیاتر بە بۆنەی توانایی ئەو لە داهێنان و نووسین بە شێوەزاری کەلهوڕ و لەک و گۆران بوو کە لە پاڵ "شامی کرماشانی"دا، بوونەتە هۆی ئەوەی ئەدەبی باشووری ڕۆژهەڵاتی کوردستان بە زیندوویی و بە درەوشاوەیی بمێنێتەوە، سنوورەکان ببەزێنێت و تیشک باوێژێتە سەر ئەدەب و هونەری ناوچەکە.

جگە لەوەش، سادەوێژی و شیرین‌زمانی و ناسک‌خەیاڵی پەرتەو بووەتە هۆی ئەوەی کە شیعرەکانی وەکوو هی باباتاهیری هەمەدانی بکرێن بە گۆرانی و وشەکانی ببن بە چرا بۆ کووچە و کۆڵانەکانی شاری کرماشان و کیژان و کوڕانی کرماشانی بە زمانی شیرینی کوردی قەزای یاری پێ‌بخەنە گیانی خۆیان.

ئێستاش ڕاستە "پەرتەو" جێی‌هێشتووین و ئەستێرەیەک لە ئاسمانی کرماشان و ئیلامی سەربەرز ڕاخوشیوە، بەڵام ناوی ئەم کەڵە شاعیرە لە کەلام و مۆسیقای ئێوارانەی کرماشان و لە لەرینەوەی ئاوی تاق وەسان و لە ئاوازی تیشەی فەرهادی بێستوونی عاشقانی ئەم سەرزەمینە دێرینەدا دەمێنێتەوە و بەگوێرەی ئاڵای هونەر و جوانی، بە سەر چیا سەرکەشەکانی شاهۆ و داڵاهۆدا دەشەکێتەوە. ڕووحی شاد و ڕێگەی پڕ ڕێبوار بێت.

عەباس غەزالی

هەولێر

٢٨/ ١/ ٢٠٢٢

مه‌نسوور جیهانی