زایەڵە - پاڵاوگەیەکی نەوت لەسەر رێگەی هەولێر - گوێڕ ئاگری گرت. گوتەبێژی بەرگریی شارستانیی هەولێر دەڵێت، هیچ زیانێکی گیانی نەبووە.
کاژێر نزیک 11:00ی شەوی 17-07-2022 پاڵاوگەیەکی نەوت لەسەر رێگەی هەولێر - گوێڕ گڕی گرت.
سەرکەوت کاڕەش، گوتەبێژی بەرگریی شارستانیی هەولێر بە تۆڕی میدیایی رووداوی راگەیاند، کۆگەیەک و تەنکەرێک گڕیان گرتووە و دوو تیمیان ناردووەتە شوێنی رووداوەکە.
بە گوێرەی ئەم هەواڵە؛ تاوەکو ئێستا قەبارەی زیانەکان دیار نین. دوای نزیکەی دوو کاژێر ئاگرەکە کۆنترۆڵ کرا.
بەپێی چەند سەرچاوەیەک، هۆکاری ئاگرکەوتنەوەکە شۆرتی کارەبا بووە، بەڵام هێشتا بە وردی هۆکارەکەی دیار نییە.
هەروەها کاروان مەولود، شۆفێری ئەو تەنکەرەی کە گڕی گرت دەڵێت، بەنزینی پێ بووە و کاتێک بینیویەتی تەنکەرەکە گڕی گرتووە، هەڵاتووە و داوای لە خەڵک کردووە لە شوێنەکە دووربکەونەوە.
