زایەڵە - لەسەر هەبونی گۆشتی بێمۆر و سەربڕینی ئاژەڵ قائیمقامیەتی سلێمانی گۆشتفرۆشی هەموان دادەخات.
قایمقامیەتی سلێمانی ڕایگەیاند، بەهۆی پابەندنەبون بەمەرج ورێنماییەکانی کارکردن و هەبونی گۆشتی بێمۆر، لیژنە هاوبەشەکانی قائیمقامیەتی سلێمانی دوکانی گۆشتفرۆشی هەموان لەگەڕەکی خەبات دادەخات.
بەپێی رێنماییەکانی تەندروستی و ڤێتێرنەری، پێویستە ئاژەڵ لەسەربڕخانەی سلێمانی سەرببڕێت، چونکە پێش و پاش سەربڕین پشکنین بۆ ئاژەڵەکەو دواتریش گۆشتەکەی دەکرێت، پاشان مۆر دەکرێت دەخرێتە بازاڕەوە.
گۆشتفرۆشی هەموان، کۆگای ماڵەی خۆی بۆ سەربڕینی ئاژەڵ بەکارهێناوە و لەدوکانەکەشییدا گۆشتەکەی فرۆشتوە، بۆیە بەفەرمانی قائیمقامی سلێمانی دادەخرێت و خاوەنەکەشی روبەڕوی رێکاری یاسایه دەکرێتەوە.
لەکاتی هەبونی گومان یان بۆ گەیاندنی سکاڵا و زانیاری بەقائیمقامیەتی سلێمانی و لیژنە هاوبەشەکان، پەیوەندی بە ژمارە مۆبایلی (07708677777)ـەوە بکەن.
کامەران کەریم
