زایەڵە ـــ ئەستێرەی تیپی نیشتمانی یۆنان بەشداری جامی جیهانی باسکەی 2023 ناکات.
یانیس ئانتۆکۆمپۆ، ئەستێرەی یۆنانی تیپی میلواکی باکس، تیپی نیشتمانی وڵاتەکەی لە جامی جیهانی باسکەی 2023 بەجێدێڵێت.
ئەستێرەی باسکەی تیپی باکس، ڕۆژی هەینی لەسەر ئێکاونتی تایبەتی خۆی ڕایگەیاند پاش نەشتەرگەری لەسەر چۆک، بەنیازە پشوو بدات تا بۆ دەسپێکی وەرزی نوێ NBA ئامادە بێت.
ناوبراو لەوبارەوە دەڵێت: هەموو کەس دەزانن من چەندە عاشقی یاریکردن بۆ تیپی یۆنانم و زۆریش بەتاسەی ئامادەبوون لەو تیپەدام بەڵام پاش چەندین مانگ ڕاهێنان و کۆبوونەوە لەگەڵ کۆڕی پزیشکی گەیشتینە ئەو قەناعەتە کە بەشداری ئەم جامی جیهانییە نەکەم، ئەمە بۆ من وەک هەڵبژاردن نەبوو بەڵکوو تەنیا ڕێگە بوو کە منی بردەوە بۆ ئاستێک لە باسکە کە چاوەڕوانم دەکردی.
یانیس لە وەرزی داهاتوودا، سێهەمین ساڵ لە گرێبەستی 5 ساڵەی خۆی لەگەڵ یانەی میلواکی، بە نرخی 228 ملیۆن دۆلار تێدەپەڕێنێ.
ئامادەکردن: کەژاڵ حەمیدی
