زایەڵە - حه‌مه‌ی حه‌مه‌سه‌عید، وه‌زیری ڕۆشنبیری و لاوانی حكومه‌تی هه‌رێمی كوردستان، ڕۆژی هه‌ینی له پارێزگای هه‌ڵه‌بجه به‌شداری كرد له مه‌راسیمی یادكردنه‌وه‌ی 154 ساڵه‌ی به قه‌زابوونی هه‌ڵه‌بجه.
مه‌راسیمه‌كه به درووشمی "هه‌ڵه‌بجه چرایه‌ك له ئازادی، ته‌مه‌نێك له گوڵزاری ئه‌ده‌ب" كاتژمێر 10ی سه‌ر له به‌یانی هەینی به ئاماده‌بوونی پارێزگاری هه‌ڵه‌بجه ئازاد تۆفیق و قائیمقامی هه‌ڵه‌بجه نوخشه ناسح به‌ڕێوه‌چوو و تێیدا ژماره‌یه‌ك چالاكی هونه‌ری سازكران.
له‌و چوارچێوه‌یه‌دا، حه‌مه‌ی حه‌مه‌سه‌عید، وه‌زیری ڕۆشنبیری و لاوان له لێدوانێكدا بۆ ڕۆژنامه‌نووسان ڕایگه‌یاند، هه‌ڵه‌بجه مێژووییه‌كی زۆر دێرینتری هه‌یه، له‌وه‌ی تا ئێستا خوێندوومانه‌ته‌وه و كارمان له‌سه‌ر كردووه.
وتیشی: به گوێره‌ی به‌ڵگه مێژووییه‌كان، هه‌ڵه‌بجه له هه‌زاره‌ی سێیه‌می پێش زاییندا، دوو ئاوه‌دانی كه هارهار و گونا هه‌بوون، كه تا ئێستا ژیانیان تێدا به‌رده‌وامه.
ئاماژه‌ی به‌وه‌شدا، ئه‌ركی مێژوونووسان و توێژه‌رانی بواری مێژووه لێكۆڵینه‌وه‌ی زیاتر بكه‌ن بۆ ئاشكراكردنی دیوی تاریكی مێژووی شارستانیی و ژیاری دێرینی هه‌ڵه‌بجه.
ڕۆژی (24ـی تشرینی دووه‌م/ نۆڤێمبه‌ری 1869)، هه‌ڵه‌بجه وه‌ك شارێكی كوردستان له سنووری قه‌ڵه‌مڕه‌وی عوسمانییدا، كرایه قه‌زا و بووه ناوه‌ندێكی كارگێڕی گرنگ له ناوچه‌كه‌دا.
کامەران کەریم
