زایەڵە - وه‌زیری ڕۆشنبیری و لاوان خه‌ڵاتی ڕێزلێنانی پێشكه‌ش به توێژه‌رانی كۆنفرانسه‌كه كرد.
حه‌مه‌ی حه‌مه‌سه‌عید، وه‌زیری ڕۆشنبیری و لاوانی حكومه‌تی هه‌رێمی كوردستان، له ڕێوڕه‌سمی كۆتایهاتنی كۆنفرانسی "جینۆساید ڕه‌نگدانه‌وه‌ی له ئه‌ده‌ب و هونه‌ردا" خه‌ڵاتی ڕێزلێنانی وه‌زاره‌تی پێشكه‌ش به توێژه‌رانی به‌شداربووی كۆنفرانسه‌كه كرد.
كۆنفرانسی "جینۆساید ڕه‌نگدانه‌وه‌ی له ئه‌ده‌ب و هونه‌ردا"، دوێنێ له هۆتێل هایكرێس له شاری سلێمانی ده‌ستی به كاره‌كانی كرد و دوو ڕۆژ به‌رده‌وام بوو.
له كۆنفرانسه‌كه‌دا نزیكه‌ی بیست توێژه‌ری بواره جیاجیاكان، به‌شداریان كردبوو. سه‌رجه‌م توێژینه‌وه پێشكه‌ش كراوه‌كان، له دوو توێی كتێبێكدا چاپ و بڵاوكرانه‌وه.
ئه‌مڕۆ دووشه‌ممه دوو پانێلی كۆنفرانسه‌كه به‌ڕێوه‌چوون و دوێنێش سێ پانێل پێشكه‌ش كرابوون.
له كۆنفرانسه‌كه‌دا ده‌یان ئه‌كادیمی و نووسه‌ر و ئه‌دیب و كه‌سایه‌تی هونه‌ری و كۆمه‌ڵایه‌تی و سیاسیی و چالاكانی بواری ئه‌نفال و جینۆساید و كیمیاییباران به‌شدار بوون.
له كۆتایی كۆنفرانسه‌كه‌دا، وه‌زیری ڕۆشنبیری و لاوان خه‌ڵاتی ڕێزلێنان و به‌شداربوونی پێشكه‌ش به هه‌ریه‌ك له توێژه‌رانی به‌شدار و پانێلیسته‌كان كرد و هیوای سه‌ركه‌وتنی بۆ خواستن.
كۆنفرانسی جینۆساید ڕه‌نگدانه‌وه‌ی له ئه‌ده‌ب و هونه‌ردا، كۆنفرانسێكی زانستیی بوو، كه وه‌زاره‌تی ڕۆشنبیری و لاوان به هه‌ماهه‌نگی له‌گه‌ڵ وه‌زاره‌تی خوێندنی باڵا و توێژینه‌وه‌ی زانستیی ڕێكیخستبوو.
کامەران کەریم
