زایەڵە ـــ ڕیکوردی جیهانی خێرایی سرویس لە پێشبڕکێیەکانی باڵەی جیهانی خانمان شکاوە.
ڕیکوردی خێرایی سرویس لە پێشبڕکێیەکانی باڵەی خانمان و لە درێژەی دیداری دوو تیپی نیشتمانی بەڕازیل و کوریای باشور شکاوە.
تیپەکانی نیشتمانی باڵەی خانمانی کوریا و بەڕازیل لە حەوتەی یەکەمی لیگی نەتەوەکانی 2024 لە شاری ڕیو لەگەڵ یەکتر ڕووبەڕوو بوونەوە کە ئەم یارییە بە ئاکامی 3 بەر 0 بە سوودی بەڕازیل کۆتایی پێهات.
ئانا کرستینا دسوزا لەو دیدارەدا بە خێرایی 118 کیلۆمەتر لە یەک کاژێردا تۆپەکەی پاس داوەتە سەر زەوینی تیپی کوریای باشوور کە وەکوو ڕیکوردێکی نوێ لە باڵەی خانمانی جیهانی دێتە ئەژمار.
ڕیکوردی پێشوو دەگەڕێتەوە بۆ تیانا بۆشکۆڤیچ لە تیپی نیشتمانی سێربێستان کە لە پێشبڕکێیەکانی پاڵەوانێتی ئەورووپای 2023دا سرویسێکی بە خێرایی 116 کیلۆمەتر لە یەک کاژێردا بەرانبەر بە تیپی ئسلۆنی تۆمار کرد.
کەژاڵ حەمیدی
