زایەڵە ـ كۆمەڵەی كێڵگە پەلەوەرییەكانی هەرێمی كوردستان بڕیاریدا لە دادگای فیدراڵی سكاڵا تۆماربكات بەهۆی ڕێگریكردن لە چوونی بەرهەمەكانیان بۆ باشور و ناوەڕاستی عێراق.
نازم عەبدوڵا سەرۆكی كۆمەڵەی كێڵگە پەلەوەرییەكان لە ڕاگەیەنراوێكدا ئاماژەی بەوەكردووە، بەهۆی رێگریكردن لە لە چوونی بەرهەمەكانیان بۆ باشور و ناوەڕاستی عێراق، رۆژی یەكشەممە لەدادگای فیدراڵی سكاڵا تۆماردەكەن.
وتیشی لایەنە پەیوەندیدارەكانی حكومەتی هەرێم نەیانتوانیوە كێشەكە چارەسەر بكەن، بۆیە بڕیاریانداوە لە دادگای فیدراڵی سكاڵا تۆماربكەن و رێگریكردن لە چوونی بەرهەمەكانیان جیاوازیكردنە لەنێوان ناوچەكان، بەو پێیەی عێراق یەك سەبەتەی خۆراكە.
بڕیاری تۆماركردنی سكاڵا لەلایەن كێڵگە پەلەوەرییەكانەوە هاوكاتە لەگەڵ دابەزینی بەرچاوی نرخی مریشك و بڕیاری حكومەتی عێراق بۆ دانانی باج بەڕێژەی لەسەدا 25 لەسەر مریشكی بەستوو، ئەوەش بە ئامانجی پاراستنی بەرهەمی ناوخۆیی.
کامەران کەریم
