زایەڵە - فەرماندەی ئینتیزامی قەزای کرماشان سەبارەت بە هێرشی چەکداری بۆ سەر ئۆتۆمبێلێک به دوو سەرنشینەوە کە بڕێک زێڕی تێدا بووە، لێدوانی دا.
بە گوێرەی ئاژانسی هەواڵی پۆلیسی ئێران، فەریق محەمەد ڕەزای یاری ڕایگەیاند، سەرلەبەیانی ڕۆژی چوارشەممە نۆزدەی مانگی هەتاوی، باوک و کوڕێکی خەڵکی کرماشان بە ئۆتۆمبێلی تایبەتی خۆیان لە کاتی گواستنەوەی دوو کیلۆگرام زێڕەوە، کەوتنە بەر هێرشی چەکداری.
زیاتر وتی، هێرش و دەستڕێژی گولە به ئۆتۆمبێلێکی جۆری پێژۆ پارس به تابلۆی ساختەوە له شەقامی ١٥ی خوردادی شارۆچکەی ئیمامی کرماشان بە چەکی جۆری کۆڵت کراوه.
ئاماژەی بەوەش دا، سەرنشینانی ئۆتۆمبێلەکە برینداربوونە و زێڕەکە دزراوە و تاوانباران هەڵاتوون.
ڕاشیگەیاند، دەسبەجێ لەلایەن پۆلیسەوە لێکۆڵینەوە لەو تاوانە دەستیپێکردوە و ئەنجامەکان ئاشکرا دەکرێن.