زایەڵە - ئەمڕۆ پێنجشەممە 2025.2.20، ئومێد خۆشناو، پارێزگاری هەولێر، لە دیوانى پارێزگا، پێشوازى لە فەرامەرز ئەسەدی، سەرکونسڵی گشتیی کۆماری ئیسلامی ئێران لە هەولێر و شاندێکى یاوەرى کرد.
لە دیدارەکەدا، کە شاکر حسێن، بەرپرسى پەیوەندییەکانى نێوان هەرێمى کوردستان و کۆمارى ئیسلامى ئێران ئامادەى بوو، وێڕاى ئەوەى هەردوولا جەختیان لەگرنگیی پەرەپێدانی پەیوەندییەکانی نێوان کۆماری ئیسلامیی ئێران و هەرێمی کوردستان کردەوە، پارێزگارى هەولێر بەبۆنەى دەستبەکاربوونى وەک سەرکونسڵ پیرۆزبایی لە کونسوڵی گشتیی کۆمارى ئیسلامى ئێران کرد و هیوای سەرکەوتنی لە ئەرکەکەیدا بۆ خواست، هەروەها ئامادەیی هەموو هاوکارى وهەماهەنگیەکى نیشاند بۆ سەرخستنى کارەکانی.
لە بەرامبەردا سەرکونسڵی کۆماری ئیسلامی ئێران، سوپاسی پارێزگاری هەولێر و ئیدارەی پارێزگاى هەولێری کرد بۆ ئەو پەیوەندییە و هەماهەنگی و هاوکاری و ئاسانکارییانەی کە لە ماوەی ساڵانى ڕابردووى پێشکەشی کونسڵخانەى وڵاتەکەیان کردووە، هەروەها تیشکى خستە سەر ئەوەى کە شارى هەولێر و پارێزگارەکەى جێگایەکى تایبەتى هەیە لەلای ئەوان و هەولێر گرنگە بەلایانەوە.
لە تەوەرێکى ترى دیدارەکەدا، سەرکونسڵى گشتیى کۆمارى ئیسلامى ئێران، سڵاو و ڕێزى هەرسێ پارێزگارى ( ئازاربایجانى ڕۆژئاوا و کرماشان و سنە )ی گەیاندە پارێزگارى هەولێر و بۆ کۆبوونەوەى فراوانى پارێزگاران بە فەرمى بانگهێشتى پارێزگارى هەولێر کرد بۆ سەردانیکردنى وڵاتەکەى کە بڕیارە لە شارى کرمانشان یان ئازربایجانى ڕۆژئاوا(ئورمیە) سازبکرێت، لەلایەن خۆیەوە پارێزگارى هەولێر وێڕاى قەبوڵکردنى بانگهێشتنامەکەى بەڕێزیان، لەڕیگەى بەڕێزیانەوە سڵاو وڕێزى خۆى بۆ پارێزگانى ئازاربایجانى ڕۆژئاوا و کرماشان و سنە نارد.
پاشان هەردوولا خۆشحاڵی خۆیان نیشاندا لە بەرامبەر جێبەجێکردنى تەواوى خاڵەکانى ڕێککەوتنامەى نێوان پارێزگاى هەولێر و پارێزگای ئازاربایجانی ڕۆژئاوا(ورمێ)، کە لە داوای واژووکردنى ئەم ڕێککەوتنامەیە زۆربەی ئەو کێشە و گرفتانەى لە ماوەى ساڵانى ڕابردوو لە هەردوو دەروازەى نێودەوڵەتى ( تەمەرچن - حاجى ئۆمەران ) هەبوونە کۆتاییان پێهاتووە.
لە کۆتایدا سەرکونسڵی کۆماری ئیسلامی ئێران لە هەولێر، دووبارە سوپاسی پارێزگاری هەولێری کرد و ئامادەیی هەموو هاوکارییەکی بۆ بەرەو پێشبردن و بەهێزکردنی پەیوەندییەکان نیشاندا.