زایەڵە ـــ "ئەوە چارەنووسی تۆیە هەڵاڵە، کە خەنجەرێک شاخەو شاخ و شارەو شار و وڵاتەو وڵات شوێنت بکەوێ، تا لێرە، لە ستۆکهۆڵم، لە گەرەکی فلەمینسبێرگ، نهۆمی چوارەمی باڵەخانەی ژمارە هەژدە لە سنگت بچەقێ"
ڕۆمانی "گرەوی بەختی هەڵاڵە" کێشەی نێوان مۆدێرنیتە و ژیانی مۆدێرن و شێوازی بیرکردنەوە و ژیانە بە شێوازێکی کۆن و تەقلیدی پاڵەوانی ڕۆمانەکە "هەڵاڵە" دەیهەوێت بە، بەجێهێشتنی کوردستان هەندێک کەلتووری نەریتی و نەشیاو بەجێبهێڵێت، بەڵام ناتوانێت لە چنگی پیاوسالاریی دەرباز ببێت، تەنانەت لە دڵی ڕۆژئاواشدا. گرنگترین تایبەتمەندی ئەم ڕۆمانە لێکچوونی زۆری ڕووداوەکانی چیرۆکەکەیە.
"گرەوی بەختی هەڵاڵە" وەک سێهەمین ڕۆمانی نووسەر "عەتا نەهایی" دێتە ئەژمار کە لە هاوینی ساڵەکانی ٢٠٠٤ و لە ٩ بەشدا نووسراوە و دوای پێداچوونەوە، یەکەم جار لە ساڵی 2007 لە لایەن چاپەمەنی مانگ لە شاری کەرەج لە ئێراندا و دواتر لە ساڵی 2008 لە لایەن چاپەمەنی ڕەنج لە سلێمانی بڵاو کراوەتەوە، ئەم کتێبە تاکوو ئێستا سێ جار لە چاپ دراوە و بڵاو کراوەتەوە، هەر جارێک بە تیراژی ١٠٠٠ دانە و هەر جاریش پێشوازیەکی باشی لێکراوە. دیزاینی بەرگی ئەم کتێبە وەرگیراوە لە بەرهەمی هونەرمەندی بەناوبانگی کورد "هادی زیائەلدینی".
لەبارەی نووسەری کتێبەکەوە
"عەتا نەهایی" لە ساڵی 1960دا لە شاری بانە لەدایک بووە و لە ساڵانی سەرەتای شۆڕشی ئیسلامییەوە دەستی بە نووسین بە زمانی دایکیی خۆی کە کوردی بووە کردووە . لە سەرەتای هەشتاکاندا، ڕووی کردە نووسینی چیرۆک بە شێوازی پڕۆفشناڵ و ڕۆمان و کورتە چیرۆکی نووسی.
تاکوو ئێستا لەم نووسەرە سێ کۆبەرهەم بە نێوەکانی "زریکە"، "تەنگانە" و "ئەو باڵندە بریندارە کە منم" و هەروەها سێ ڕۆمان بە نێوی "گوڵی شۆڕان"، "باڵندەکانی دەم با" و "گرەوی بەختی هەڵاڵە" لە چاپ دراوە.
لە وەرگێڕانەکانی ناوبراو دەتوانین ئاماژە بەینە سەر ڕۆمانی "شازدە ئحتجاب" لە "هووشەنگ گوڵشیری" نووسەری ئێرانی و کۆچیرۆکی "ماڵی ڕووناکان" لە نووسەرانی ئێرانی و ڕۆمانی "بارۆنی سەر دارەکان" بەرهەمی "ئیتالۆ کالڤینۆ" و ڕۆمانی "قەسابخانەی ژمارە ٥" بەرهەمی "کوورت ڤۆنێ گات" و هەروەها ڕۆمانی "سووکی لە تاقەت بەدەری بوون" بەرهەمی "میلان کۆندێرا".
جێی ئاماژەیە لە ساڵی ٢٠٠٥ لە شاری هەولێری پایتختی هەرێمی کوردستان، عەتا نەهایی خەڵاتی "ئاراس"ی بۆ باشترین ڕۆماننووسی کورد و مەدالیای زێڕی "ئەحمەد هەردی" بۆ داهێنان لە سالی ٢٠٠٨دا لە شاری سلێمانی وەرگرتووە.
لەبارەی وەرگێڕەکانی ئەم ڕۆمانەوە
ڕۆمانی "گرەوی بەختی هەڵاڵە" لە لایەن "موستەفا بەستامی" و بە نێوی "helale" وەرگێڕاوەتە سەر زاراوەی کرمانجی و لە لایەن چاپەمەنی ئەوێستا لە ئەستەمبوڵ لە چاپ دراوە. وێڕای ئەوەش "ڕەزا کەریم موجاور" ئەم ڕۆمانەی لە ساڵەکانی ٢٠١٧دا بە نێوی "دوایین ڕۆژەکانی ژیانی هەڵاڵە" وەرگێڕاوەتە سەر زمانی فارسی و لە لایەن چاپەمەنی ئەفرازەوە لە شاری تاران چاپ و بڵاو کراوەتەوە.
پەیامی کتێبەکە
هەڵاڵە کچێکی گۆڕانخوازە کە ئازادانە بیر دەکاتەوە و نایەوێت خۆی بداتە دەستی هەلومەرجی پێکهاتەی کۆمەڵگاوە و بەها نەخۆشەکانی کۆمەڵگای پیاوسالاری وەکوو شمشێرێک دڵی دەکاتە ئامانج، چونکە عەقلییەتی دیکتاتۆری کۆمەڵگا بەرگەی ئەو یاخیبوونە ناگرێت.عەتا نەهایی لەم ڕۆمانەدا عەشق و خۆشەویستی لە کۆمەڵگای کوردیدا وەک پڕۆسەیەکی شکستخواردوو دەبینێت، خۆشەویستییەک کە هەمیشە چەوسێندراوە و دەبێتە قوربانی.
کەژاڵ حەمیدی