زایەڵە - بڕیارنامەی کۆتایی ڕێپێوانی ڕۆژی جیهانیی قودس لە ئێران بڵاوکرایەوە و تێیدا ویڕای جەخت لەسەر ئەوەی کە فەڵەستین پرسی ژمارە یەکی جیهانی ئیسلامە و و ڕووخانی حەتمی ڕژێمی داگیرکار ئەگەرێک نییە، بەڵکوو پێویستیەکی مێژووییە لە پێشهاتەکانی داهاتووی ناوچەکە و جیهان، سەبارەت بە گوشارەکانی سەر ئێران لە لایەن ئەمریکاوە، ڕادەگەیێنن؛ ئێمە گەلی ئازای ئێرانی ئیسلامی، قسەی خام و هەڕەشە پووچەکانی کاربەدەستانی ئەمریکی بە دەرئەنجامی حیساباتی هەڵەیان لە تێگەیشتن لە گەلی ئێران دەزانین و ڕایدەگەێنین کە هەڕەشەکان هەرگیز لە ڕووی ئێرانەوە بە هیچ شوێنێک ناگەن
دەقی ئەو بڕیارنامە لە درێژەدا هاتووە؛
1 – ئێمە بەشداربووانی ئەم ڕێپێوانە، فەڵەستین بە پرسی ژمارە یەک لە جیهانی ئیسلامی و خاڵی چەقی ڕوبەڕوبونەوەی مێژوویی نێوان ” گوتاری خۆڕاگری ئیسلامی ” و پرۆژە هەژموونگەرەکانی سیستەمی سەرمایەداری جیهانی دەزانین. وێڕای ئیدانەکردنی توندی ” منداڵکوژی “، ” جینۆساید “، “ئاوارەیی زۆرەملێ “، ” ڕەگەزپەرستی “، ” لەناوبردنی ژێرخانی ژیان ” و ” سیاسەتی گۆڕینی دیمۆگرافی “، پشتیوانییەکی پتەوی خۆمان بۆ دۆزی ڕزگاریی فەڵەستین ڕادەگەێنین و داوای هەنگاوی خێرا لە لایەن کۆمەڵگای نێودەوڵەتی بۆ ڕاگرتنی ئەم تاوانانەی دژ بە مرۆڤایەتی و دادگایی کردنی سەرکردەکانی ڕژێمی زایۆنیستی، بەتایبەتی قەسابی غەززە، بنیامین نتانیاهۆ، لە دادگای تاوانی نێودەوڵەتیدا دەکەین و ئازادکردنی گەیاندنی یارمەتییە مرۆییەکان و ئاوەدانکردنەوەی غەززە وەک پێویستییەکی مرۆیی دەزانین.
2 – ئێمە خەڵکی تێگەیشتووی ئێرانی ئیسلامی لە ژێر ڕۆشنایی فێرکارییە ئیسلامییەکان و بە ئیلهام وەرگرتن لە دکتۆرینی دژە ستەمکاریی شۆڕشی ئیسلامی، پشتیوانی بێ مەرجی سیستەمی هەژموونگەرایی، بە تایبەت تەیارکردنی مەکینەی جەنگیی ڕژێمی ساختەی زایۆنیستی لە لایەن ویلایەتە یەکگرتووەکانی ئەمریکا و بەشێک لە حکومەتە ئەورووپییەکان و دابینکردنی چەترێکی ئەمنی بۆ درێژەدان بە تاوانەکانی ئەم ڕژێمە لە چوارچێوەی پێکهاتە کەموکوڕییەکانی یاسای نێودەوڵەتی دەزانین، نەک وەک نیشانەی دەسەڵات، بەڵکوو وەک دەرکەوتنی قەیرانی شەرعییەت و دابەزینی وردە وردەی هەژموونی ڕەوتی ستەمکاری. بە تێگەیشتنێکی قووڵ لە هاوکێشەکانی بەرخۆدان و تایبەتمەندییەکانی شەڕی ئیرادە، بە ویژدانی بەئاگابوو و گەلانی ستەملێکراو ڕادەگەێنین کە هیچ چەکێکی پێشکەوتوو توانای بەرگەگرتنی هێزی ئیمان و ئیرادەی شۆڕشگێڕانە و سەقامگیری ستراتیژی بەرەی خۆڕاگریی نییە و ڕووخانی حەتمی ڕژێمی داگیرکار ئەگەرێک نییە، بەڵکوو پێویستیەکی مێژووییە لە پێشهاتەکانی داهاتووی ناوچەکە و جیهان.
3 – ئێمە خەڵکی بەڕۆژووی ئێرانی ئیسلامی، ئۆپەراسیۆنی زریانی سەرکەوتووی ئەقسا و دواتر ” بەڵێنی ڕاستگۆیانەی یەک و دوو ” بە گرنگترین فاکتەری گۆڕینی هاوسەنگی هێز و دامەزراندنی خۆڕاگری وەک یاریزانێکی سەرەکی لە هاوکێشە جیۆپۆلیتیکییەکانی ناوچەکە دەزانین. بە ڕێزگرتن لە یادی شەهیدان ئایەتوڵڵا ڕەئیسی و ئەمیر عەبدوڵڵاهیان، پێمان وایە تێکەڵکردنی خوێنی شەهیدی قودس، حاجی قاسم سولەیمانی، ڕابەری خۆڕاگری، سەید حەسەن نەسروڵڵا و شێخ هاشم سەفیەدین بە خوێنی پاکی شەهیدان ئەبومەهدی موهەندیس، ئیسماعیل هەنیە و یەحیا سینوار دەرکەوتنێکی بەرجەستەی یەکێتی کێڵگەکانە. ئێمە پێمان وایە خوێنی پاکی ئەو شەهیدانە سنورە دەستکردەکانی بەزاندووە و بەرەی یەکگرتووی خۆڕاگری لە دژی زایۆنیزمی جیهانی پتەوتر کردووە و پرسە ناوازەکەیان بە بەڵگەی ” زیندوویی خۆڕاگری ” و ” بەردەوامی دەسەڵاتی کۆمەڵایەتی ” دەزانین.
4 – ئێمە خەڵکی ئاگاداری ئامادەبووی ئەم ڕێپێوانە، بە هاودەنگی لە گەڵ گەلانی ئازادی جیهان، ” پاشکەوتنی پڕۆژەی شەرعییەتدان بە ڕژێمی زایۆنیستی لە بیروڕای گشتیی نێودەوڵەتی “، ” فراوانبوونی بزووتنەوەکانی دژە ڕەگەزپەرستی “، ” قووڵبوونەوەی هەڵمەتی بایکۆت “ی پەیوەندییەکانی دژ بە زایۆنیزم بە پیشاندەری پرۆسەی داڕمانی ئیداری، سیاسی، پێکهاتەیی و کۆمەڵایەتی ئەم ڕژێمە داگیرکارە دەزانین و هۆشداری دەدەین بە بەشێک لە حکومەتەکانی ناوچەکە کە هەوڵی ئاساییکردنەوە و شەرعییەتدان بەم دەسەڵاتە ساختەیە دەدەن، جەختیش دەکەینەوە کە ئەزموونی وڵاتی ئۆکرانیا دەریخستووە کە ئەمریکا و هاوبەشە ڕۆژئاواییەکانی، تەنیا لە هەوڵی دابینکردنی بەرژەوەندییەکانی خۆیاندان.
5 – ئێمە گەلی ئێران هەمیشە بێدەنگی حکومەتە ئیسلامییەکان سەبارەت بە جینۆسایدی گەلی موسڵمانی غەززە و دەستدرێژی سەربازی و هێرشی دڕندانە و بێبەزەییانە لە لایەن ئەمریکا و بەریتانیا بۆ سەر یەمەن شەرمەزار دەکەین. هەروەها جەخت لە سەر پێویستی کردەیی دەکەینەوە بۆ کۆتاییهێنان بەم تاوانە دڕندانە. ئێمە پێمان وایە خۆڕاگریی گەلانی چەوساوە، سەرەڕای هەموو گوشارەکان، ڕێچکەی مێژوویی خۆی پەیرەو دەکات و هاوکێشەکانی دەسەڵات لە ناوچەکەدا دەگۆڕێت. داهاتوو هی بەرەی خۆڕاگرییە.
6 – ئێمە گەلی ئازای ئێرانی ئیسلامی، قسەی خام و هەڕەشە پووچەکانی کاربەدەستانی ئەمریکی بە دەرئەنجامی حیساباتی هەڵەیان لە تێگەیشتن لە گەلی ئێران دەزانین و ڕایدەگەێنین کە هەڕەشەکان هەرگیز لە ڕووی ئێرانەوە بە هیچ شوێنێک ناگەن و هەر کردەوەیەک یان هەنگاوێکی هەڵەی ئەمریکا و ڕژێمی پیسی زایۆنیستی بە وەڵامێکی یەکلاکەرەوە و چەقێنەرەوە بەرەوڕوو دەبێتەوە.