زایەڵە - زانكۆی سلێمانی دووهەمین فێستیڤاڵی ناوازەی ئاینیی ڕێكخست‌ و لەلایەن بەشداربووان‌ و میوانانەوە بە كارێكی گرنگ‌ و پڕ بایەخ بۆ تێكەڵبوون‌ و چوونە ناو دڵی جەماوەر و كۆمەڵگە وەسفكرا.

ڕۆژی ٢٧ی ئاداری ٢٠٢٥، بەئامادەبوونی (پڕۆفیسۆر دكتۆر كۆسار محەمەد عەلی) سەرۆكی زانكۆی سلێمانی‌ و (د.هەڤاڵ ئەبوبەكر) پارێزگاری سلێمانی‌ و یاریدەدەرانی سەرۆكی زانكۆ و مامۆستایانی ئاینیی و مامۆستایان‌ و فەرمانبەران‌ و خوێندكارانی زانكۆی سلێمانی، دووهەمین فێستیڤاڵی ئاینیی زانكۆی سلێمانی بە دروشمی (قورئان ئارامی دڵانە) لە هۆڵی كۆنگرێسی زانكۆی سلێمانی بەڕێوەچوو.

فێستیڤاڵەكە تایبەت بوو بە قورئانی پیرۆز و چالاكی (پێشبڕكێی قورئان، پێشانگەی قورئانە دەستنووسەكان، مەڕاسیمی قورئان خوێندن‌ و دابەشكردنی خەڵاتی ڕێزلێنان‌ و ئێوارەخوانێك بۆ ئامادەبووان)ی لەخۆگرتبوو.

دوای پێشكەشكردنی وتەی بەخێرهاتن، (پڕۆفیسۆر دكتۆر كۆسار محەمەد عەلی) سەرۆكی زانكۆی سلێمانی وتەیەكی پێشكەشكرد و ڕایگەیاند: ئەم مانگە ئارامكەرەوەی ناخی مرۆڤە و ڕێگەمان بۆ خۆشتر دەكات، تا بە بیرێكی ڕوونتر و سەركەوتووانەوە، لە گەشتە ڕۆحی‌ و ئەكادیمی‌ و زانستییەكان نزیكببینەوە و بەردەوامبین.

جەختیشيكردەوە لەسەر ئەوەی، كە پەروەردەی دروست بەبێ زەمینەسازی ڕۆحی دروستنابێت‌.

وتیشی: “ئەم كۆبوونەوەیە، نەك هەر پەیوەندی ڕۆحی بەهێزدەكات، بەڵكو ئاڵوگۆڕ و لێكتێگەیشتنی كلتووری لە نێوان خوێندكارانی پاشخانی ناوچەیی جۆراوجۆردا بەرەو پێشەوەدەبات‌‌ و وابیر دەكەینەوە، كە ئەم فێستیڤاڵە ئاینییە ژینگەیەكی پاڵشت‌ و گشتگیر لە نێوان خوێندكاران‌ و مامۆستایان‌ و كارمەندان‌ و دەرەوەی ژینگەی زانكۆش لە ڕووی خێزخوازی‌ و چاكەكاری‌ و كاری هاوبەشەوە دروستبكات”.

سەرۆكی زانكۆى سلێمانی سوپاسی سەرجەم بەشداربووانی كردو ئاماژەی بەوەشكرد، كە هەوڵەكانتان پاداشتی لە ژیانی دنیایی‌ و قیامەتدا دەبێت. هەروەك سوپاسی مامۆستایان‌ و هەڵسەنگێنەران‌ و سپۆنسەرانی فێستیڤاڵەكە‌ و كەناڵ (٨)ی كرد، كە سپۆنسەری میدیایی گرتەئەستۆ.

پاشان (د.هەڤاڵ ئەبوبەكر) پارێزگاری سلێمانی، لە وتەیەكدا ڕۆشنایی خستەسەر گرنگی‌ و پیرۆزی ئەم مانگە، هەم لە ڕووی ئاینی، كە قورئانی تێدا دابەزیوە، هەم لە ڕووی نەتەوەییشەوە، كە ڕاپەرینی تێدا كراوە و وتی: “دەبێت ڕەخنە لە خۆمان بگرین، بۆچی نەمانتوانی ڕاپەڕین بە ئاڕاستەیەكی ڕاستی خۆیدا بەرین، كە جارێكی دیكە ستەمكار نەگەڕێتەوە، لەبەرئەوەی ئێمە تەنیا ستەمكارمان لەناوبرد، ستەمكاریمان لەناو نەبرد، ئێستا دەتوانیت لە هەموو كۆڵانێكدا ستەمكارێك، یان نادادییەك بدۆزیتەوە، چونكە دەستمان بۆ ڕیشەكێشكردنی ئەو كێشەیەی ئەو هەموو قوربانییە لەپێناویدا درابوو، نەبردبوو”.

دواتر (پ.ی.د.خالید) ڕاگری كۆلێژی زانستە ئیسلامییەكانی زانكۆی سلێمانی، وتەی ليژنەی باڵای كۆنفڕانسی پێشكەشكرد و وێڕای ئاماژەدان بە گرنگی فیستیڤاڵەکە، سوپاسی پاڵپشتییەكانی سەرۆكی زانكۆ و ڕێكخەران‌ و سپۆنسەرانی کرد و ڕایگەیاند: ئەم چالاكییە بەهەوڵ‌ و هیمەتی هەموولایەك بەئەنجام گەیەنرا و سوپاسی بێپایانی بەشداربووان‌ و ئامادەبووانيشی كرد.

هاوكات بڕگەكانی تایبەت بە قورئانخوێنانی ناوخۆیی‌ و نێودەوڵەتی بەڕیوەچوو، كە (١٢)قورئانخوێنی شاری سلێمانی بەشدارییان كرد و لەلایەن سەرۆكی زانكۆی سلێمانییەوە قەڵغانی ڕێزلێنانیان پێدرا. سەرباری بەشداری منداڵانی حافز قورئان‌، كە لەلایەن پارێزگاری سلێمانییەوە قەڵغانی ڕێزلێنانیان پێبەخشرا، لەگەڵ بەشداری چەند قورئانخوێنێكی نێودەوڵەتی‌ و پێشكەشكردنی چەند موناجاتێك، كە كەشێكی ڕۆحی‌ و تایبەتیان بە فێستیڤاڵەكە بەخشیبوو.

هەر لە چوارچێوەی ئەم بۆنە ئاینییەدا، پێشانگایەكی قورئانە دەستنووسەكان كرایەوە و یەكێك لەو قورئانە دەستنوسانەی، كە لە پێشانگەكەدا نمایشكرابوو، (قورئانەكەی گڵەزەردە) بوو.

ئەم قورئانە، بە قورئانەكەی (شێخ حەسەنی گڵە زەردە) ناسراوە، كە بەپێی بەڵگەنامە مێژووییەكان لەلایەن (ئەحمەد پاشای والی بەغداوە) وەك دیارییەك پێشكەش (بەشێخ ئەحمەدی گڵە زەردە) كراوە، قورئانەكەی گڵە زەردە بەخەتی (ثلث) نووسراوە و لەلایەن بنەماڵەكەیانەوە پارێزراوە و لەلایەن بنكەی ژین-يشەوە كاری نوێكردنەوەی بۆ كراوە.

جێی باسە، بەر لە دەستپێكردنی مەڕاسیمی فێستیڤاڵەکە، بە بەشداری (پڕۆفیسۆر دكتۆر كۆسار محەمەد عەلی) سەرۆكی زانكۆی سلێمانی‌ و ژمارەیەكی زۆر لە مامۆستایان‌ و خوێندكاران‌ و فەرمانبەران، تاقیكردنەوەی تایبەت بە قورئانی پیرۆز بەڕێوەچوو.

لەوبارەیەوە، (د.ئومێد محەمەد) سەرۆكی لیژنەی تاقیكردنەوەكان ڕایگەیاند: (٣٦٢) کەس لە مامۆستایان‌ و فەرمانبەران‌ و خوێندكاران ناوی خۆیان بۆ بەشداریكردن لە تاقیكردنەوەی قورئانی پیرۆز تۆمار كردبوو، بەڵام ڕێژەی بەشداربووان لەوە كەمترە بووە.

وتیشی: “تاقیكردنەوەکە بەسەر پێنج ئاستدا دابەشكرابوو (٣٠ جوزئی، ١٠ جوزئی سەرەتا و كۆتایی، سێ جوزئی سەرەتا و كۆتایی، جوزئی عەممە و تەبارەك، جوزئی عەممە).

ئاماژەی بەوەشكرد، كە پرسیارەكان بەشێوەی هەڵبژاردن بووە و لەسەر هەر ئاستی (یەكەم، دووەم، سێیەم) دیاریكراوە.

خوێندكارانی بەشداربوو لە تاقیكردنەوەكە، وێڕای دەربڕینی خۆشحاڵی خۆیان، دەستخۆشیان لە ڕێكخەرانی فێستیڤاڵەكە كردو بە هەنگاوێكی گرنگیان بۆ تێكەڵبوون‌ و یەكترناسینی خوێندكارانی كۆلێژە جیاوازەكان وەسفكرد.

پاش ڕاگەیاندنی ئەنجامەكانی تاقیكردنەوەكە لەناو مەڕاسیمی فێستیڤاڵەكەدا، بەشداربووە سەركەوتووەكان لەلایەن سەرۆكی زانكۆی سلێمانییەوە خەڵاتیان بەسەردا دابەشكرا. لە هەمانكاتيشدا قەڵغانی ڕێزلێنان بە كۆمپانیاكان بەخشرا، كە بۆ سەرخستنی فێستیڤاڵەكە هاوكار و یارمەتیدەر بوون.

لە كۆتایدا بەشداربووان‌ و میوانانی فێستیڤاڵەكە بۆ ئیفتار میوانی زانكۆی سلێمانی بوون.