زایەڵە - دوای ئەوەی ڕێبەری ڕەوتی سەدر لە عێراق بایكۆتی هەڵبژاردنی داهاتووی عێراقی ڕاگەیاند، دوابەدوی ئەویش چەند گەورە هۆزێكی شیعەی خوارووی عێراق، پشتیوانی خۆیان بۆ بڕیارەكەی سەدر دەربڕی و بڕیاریاندا بەشداری لەو هەڵبژاردنەدا نەكەن.
رەزا ئالی تەمیمی، سەرۆكی كۆمەڵەی هۆزەكانی بەنی تەمیم لە راگەیێندراوێكدا ئاماژە بەوە دەكات، ئێمە وەك شێخ و نەوەكانی بەنی تەمیم، بە نیگەرانییەكی زۆرەوە چاودێریی ئەو دۆخە پڕ لە گەندەڵییە و باڵادەستی گەندەڵەكان دەكەین لە وڵاتە ئازیزەكەماندا، هەر بۆیە پشتیوانی خۆمان بۆ هەڵوێستەكەی سەركردە موقتەدا سەدر رادەگەیێنین، بۆ بایكۆت كردنی هەڵبژاردن و بەشداری نەكردن لە دەوڵەتێك كە دەستی داع#شی گەندەڵ و تیرۆریست بەڕێوەی دەبات و سامانی میللەتیان تاڵان كردووە و خەڵكەكەیان هەژاركردووە.
هەر لەو چوارچێوەیەشدا مەیسەم كازم، سەرۆكی هۆزەكانی بەهادەل، بە راگەیێندراوێك ئەوانیش پاڵپشتی خۆیان بۆ بڕیارەكەی موقتەدا سەدر دەربڕیوە و باس لەوە دەكات، پاڵپشتی و پشتیوانی تەواوی خۆمان بۆ بڕیارەكەی سەید موقتەدا سەدر دەردەبڕین بۆ نوێكردنەوەی بڕیاری بایكۆتی هەڵبژاردنی پەرلەمانی داهاتوو، وڵاتەكەمان پێویستی بە كۆمەڵێك باوەڕدار هەیە كە دڵسۆز بن بۆ ئایین، گەل و وڵاتەكەیان، لایەنگری ستەملێكراو و نەیاری ستەمكار بن.
دوابەدوای ئەوانیش هەریەكە لە هۆزەكانی زوهەیبات، ئیمارە بەنی حەسەن، بەنی مەنسوور و بەنی لام بەهەمان شێوە بایكۆتی هەڵبژاردنیان راگەیاندووە.
فراوان بوونی بەرەی بایكۆتی هەڵبژاردنی پەرلەمانی داهاتووی عێراق دوای ئەوە دێت كە رۆژی 27ـی ئەم مانگە، موقتەدا سەدر، رێبەری رەوتی نیشتمانیی شیعەكان، رایگەیاند: بۆ ئاگاداری هەمووان، تا گەندەڵی و گەندەڵكاران بەردەوامبن، بەشداری پرۆسەی هەڵبژاردنێك ناكەم كە هیچ كات لە خەمی بەرژەوەندی گشتیی نەبێت، تەنیا لە بەرژەوەندی تایفەگەری و حیزبی بێت و بێباك بن لە ئازار و نەهامەتیی گەل.
ئەوەش لەكاتێكدا كە بڕیارە پێش رێككەوتی 25ـی تشرینی دووەمی ئەم ساڵ، هەڵبژاردنی پەرلەمانی عێراق بەڕێوەبچێت.
ک