زایەڵە - لە وتاری ڕۆژی جەژنی پیرۆزی ڕەمەزا لە تاران ڕێبەری باڵای شۆڕشی ئیسلامی ئێران ڕایگەیاند:" هەڵوێستەکانی ئێمە هەمان هەڵوێستەکانی پێشووە و هەڕەشە لە ئێمە دەکەن. ئەگەر هەر خراپەکارییەک بکرێت لێدانێکی بەهێز و بەرامبەری بە دواوە دەبێت."
ئایەتوڵڵا خامنەیی وێڕای پیرۆزبایی جەژنی ڕەمەزان و 12 ی خاکەلێوە ساڵڕۆژی کۆماری ئیسلامی ئێران، سەبارەت بە ڕێپێوانی ڕۆژی جیهانیی قودس، وتی: پەیامی زۆر گرنگ لەم ڕێپێوانە ڕەوانەی جیهان کرا و کەسانێک کە دەبوو ئەو پەیامە وەربگرن، گەورەیی گەلی ئێرانیان بینی.
ڕێبەری باڵای شۆڕشی ئیسلامی ئێران بە ئاماژە بە تاوانەکانی ڕژێمی زایۆنیستی لە فەڵەستین ڕونی کردەوە:" وڵاتانی ڕۆژئاوا گەنجانی تێکۆشەری ناوچەکە بە گرووپەکانی پرۆکسی تۆمەتبار دەکەن، من دەمەوێت بڵێم لەم ناوچەیە تەنیا هێزێکی پرۆکسی هەیە و ئەویش ڕژێمی داگیرکاری زایۆنیستییە، ئەم ڕژێمە کۆمەڵکوژی دەکات و ئەگەر دەستی بگات دەستدرێژی دەکاتە سەر وڵاتانی دیکە، وەک ئەوەی کە لە سوریا بینراوە و ئەمەش بە نوێنەرایەتی لە زلهێزە خۆسەپێنەکان ئەنجام دەدات.
ئەوەشی خستەڕوو: ئەم باندە خراپەکارە دەبێت لە فەڵەستین ڕیشەکێش بکرێت و واش دەبێت و هەمووان دەبێت هەوڵ بدەن تا ئەم ڕژێمە ناپاکە لە ناوچەکە بسڕنەوە.
ئایەتوڵڵا خامنەیی سەبارەت بە ئەمریکاش باسی لەوەشکرد: هەڵوێستەکانی ئێمە هەمان هەڵوێستەکانی پێشووە، ئەوان هەڕەشە دەکەن کە خراپەکاری دەکەن، ئەگەر خراپەیەک بکرێت بە دڵنیاییەوە لێدانی بەرامبەر بەهێز دەبێت