زایەڵە-بەرپرسی مەكتەبی هەڵبژاردن و ئاماری كۆمەڵی دادگەری ئاماژەبەوەدەكات ئامادەكارییەكانی بۆ بەستنی كۆنگرەی پێنجەمی دەستپێكردووە و بە ئەگەری زۆرەوە لەم مانگەدا كۆنگرە دەبەستین و چەندین گۆڕانكاری لە مەڵبەند و سەركردایەتییەكان ئەنجام دەدرێت.
بێستوون حەمەساڵح، بەرپرسی مەكتەبی هەڵبژاردن و ئاماری كۆمەڵی دادگەری رایگەیاند، سەرقاڵی ئامادەكارین بۆ بەستنی كۆنگرە، لەم مانگەدا و نیوەی ئامادەكارییە سەرەتاییەكان تەواوكراون، پڕۆژەی بەستنی كۆنگرەكەش لەلایەن لیژنەیەكی تایبەتەوە ئامادەكراوە و چاوەڕوانن ئەم هەفتەیە یان هەفتەی داهاتوو ئەنجوومەنی سەركردایەتی پڕۆژەكە پەسند بكات، بۆ ئەوەی لیژنەی ئامادەكاری كۆنگرە دەست بە كارەكانیان بكەن.
ئاماژەی بەوەشكردووە، لەو كۆنگرەیەدا گۆڕانكاری لە هەیكەلی حیزب، پەیڕەوی نێوخۆی حیزبەكەمان و ژمارەی مەڵبەندەكاندا دەكەین، ئەندامانی ئەنجوومەنی سەركردایەتی و سەرۆكیش هەڵدەبژێردرێن، هاوكات لیژنەی ئامادەكاری كۆنگرە لە حەوت كەس پێكدێن، لە كۆنگرەكەدا هیچكام لە ئەندامانی لیژنەی ئامادەكاریی ناتوانن خۆیان بۆ ئەنجوومەنی سەركردایەتیی حیزب بەربژێر بكەن.
كۆمەڵی دادگەری، لە ئایاری 2001 دامەزراوە، تاوەكو ئێستا چوار كۆنگرەی كردووە، دوایین كۆنگرە لە شوباتی 2021 بوو، لەو كۆنگرەیەدا ناوی حیزبەكە لە كۆمەڵی ئیسلامیی كوردستانەوە، گۆڕدرا بۆ كۆمەڵی دادگەریی كوردستان، هاوكات عەلی باپیر، پۆستەكەی لە ئەمیرەوە گۆڕدرا بۆ سەرۆك.
ک