زایەڵە - وەزیری دەرەوەی ئێران و بەڕێوەبەری ئاژانسی نێودەوڵەتیی وزەی ئەتۆم لەبارەی پرۆگرامی ئەتۆمیی ئێران قسەیان کرد و بەرپرسە ئێرانیییەکە جەختی لەسەر ئەوە کردەوە پێویستە ئاژانس هەڵوێستێکی روونی سەبارەت بە هەڕەشەکان بۆ سەر دامەزراوە ئەتۆمییەکانی ئێران هەبێت .
وەزارەتی دەرەوەی ئێران سێشەممە 1ی نیسانی 2025 بڵاویکردەوە، "عەباس عێراقچی، وەزیری دەرەوەی ئێران و رافایل گرۆسی، بەڕێوەبەری ئاژانسی نێودەوڵەتیی وزەی ئەتۆم، بە تەلەفۆن دوایین دۆخی هاوکاریی نێوان ئێران و ئاژانسی وزەی ئەتۆمیان تاوتوێ کرد."
بەگوێرەی وەزارەتی دەرەوەی ئێران، عەباس عێراقچی رایگەیاندووە، پێویستە ئاژانسەکە هەڵوێستێکی روون و ئاشکرای هەبێت سەبارەت بە هەڕەشەکان بۆ سەر دامەزراوە ئەتۆمییەکانی ئێران.
عێراقچی ئاماژەی بەوەشکردووە، "بە سەرنجدان بە بەردەوامیی ئەو هەڕەشانە، کۆماری ئیسلامی ئێران هەموو رێوشوێنێکی پێویست بۆ پاراستنی بەرنامە ئەتۆمییەکەی دەگرێتەبەر."