زایەڵە - فراکسیۆنە کوردستانییەکان تەئکید دەکەنەوە بەشداری لە هیچ دانیشتنێکی ئەنجومەنی نوێنەرانی عیراق ناکەن و پەرلەمانتارێکی یەکێتیش رایدەگەیەنێت، تا پرۆژە یاسای بە پارێزگابوونی هەڵەبجە تێنەپەڕێندرێت بەشداری لە دانیشتنەکان ناکەن و رێگاش بە تێپەڕاندنی هیچ پرۆژە یاسایەک نادەن.
لەوتووێژی لەگەڵ پەیامنێری زایەڵە چرۆ حەمە شەریف ئەندامی ئەنجومەنی نوێنەرانی عیراق رایگەیاند،ئەگەر دانیشتنەکانی ئەنجومەنی نوێنەران دەستپێبکاتەوە، ئەوە ئێمە وەک فراکسیۆنە کوردستانییەکان بڕیاری ئەوەمانداوە بەشداری لە هیچ دانیشتنێکی پەرلەماندا نەکەین، ئێمە کە 65 پەرلەمانتارین ئامادەی هیچ دانیشتنێک نابین و رێگاش نادەین هیچ پرۆژە یاسایەک تێپەڕێندرێت تا پرۆژە یاسای بە پارێزگابوونی هەڵەبجە نەخرێتە بەرنامەی کارەوە".
وتیشی، دوای ئەوەی پڕۆژە یاساکە لەسەر داوای ئێمە خرایە بەرنامەی کارەوە، بەڵام دەنگی پێنەدرا، ئێمە وەک فراکسیۆنە کوردستانییەکان بڕیاری بایکۆتی دانیشتنەکانمان دا و ئامادەی دانیشتنەکان نابین، هەروەها پێویستە پرۆژە یاسای بەپارێزگابوونی هەڵەبجە بە تەنها بخرێتە بەرنامەی کارەوە و لە پاڵ هیچ پرۆژە یاسایەک نەبێت و دەشبێت پەرلەمانتاران ئامادەبن و دەنگی پێبدەن، بەپێچەوانەوە ئێمە ئامادەی هیچ دانیشتنێک نابین.
ئەو پەرلەمانتارەی یەکێتی ئاماژەی بەوەشکرد،ئێمە دەچینەوە پەرلەمان و بەشداری لیژنەکان دەکەین، بەڵام بەشداری دانیشتنەکان ناکەین، بۆ ئەوەی بزانن کە ئێمە سورین لەسەر تێپەڕاندنی پرۆژە یاساکە".
ک
April 04, 2025