وێڕای "بە نادەستووری و نادادپەروەرانە" وەسف کردنی بڕیاری دادگای فیدڕاڵی سەبارەت بە نەوت و گازی هەرێم، حکومەتی هەرێم دووپات لە بەردەوامبوون بۆ کارکردنی هاوبەش لەگەڵ بەغدا دەکاتەوە لەپێناو چارەسەرکردنی ئەو پرسە.
بەپێی ڕاپۆرتی زایەڵە، ئەنجومەنی وەزیرانی هەرێمی کوردستان بڕیاری دادگای باڵای فیدراڵی سەبارەت بە نەوت و گازی هەرێمی کوردستان "بە نادەستووری ونادادپەروەرانە" دادەنێت و جەختی لەوە کردەوە کە بەردەوام دەبێت "لە هەوڵەکانی بۆ پارێزگاریکردن و داکۆکیکردن لە ماف و دەسەڵاتە دەستوورییەکانی خۆی ھەروەک لە دەستووری عێراق جێگیرکراون".
ئەنجومەنی وەزیرانی هەرێمی کوردستان ئەمڕۆ چوارشەممە، 23ی شوباتی 2022، بە سەرۆکایەتی مەسرور بارزانی، سەرۆکی ئەنجومەنی وەزیران و ئامادەبوونی قوباد تاڵەبانی، جێگری سەرۆک وەزیران کۆبووەوە.
بەپێی ڕاگەیەنراوەکە، ئەنجومەنی وەزیران گفتوگۆی دەربارەی بڕیاری دادگای باڵای فیدراڵی لە ڕۆژی 2022/2/15 کرد تایبەت بە کەرتی نەوت و گاز لە هەرێمی کوردستان. دوای گفتوگۆی چڕ و هەمەلایەنەی بڕیارەکە، ئەنجومەنی وەزیران، بڕیاری دادگای باڵای فیدراڵی سەبارەت بە نەوت و گازی هەرێمی کوردستان، بە نادەستووری ونادادپەروەرانە دادەنێت و جەختی لەوە کردەوە کە هەرێمی کوردستان، بەردەوام دەبێت لە هەوڵەکانی بۆ پارێزگاریکردن و داکۆکیکردن لە ماف و دەسەڵاتە دەستوورییەکانی خۆی ھەروەک لە دەستووری عێراق جێگیرکراون کە زۆرینەی خەڵکی عێراق لە ساڵی 2005 دەنگیان بەو دەستوورەدا .لە هەمانکاتدا، حکومەتی هەرێم هەڵوێستی نەگۆڕی خۆی دووپات دەکاتەوە بۆ بەردەوامبوون لە کارکردنی هاوبەش لەگەڵ حکومەتی فیدراڵی، بۆ گەیشتن بە ڕێککەوتن لە سەر چۆنیەتی چارەسەرکردنی ئەم بابەتە.
هەروەها سەرۆکوەزیران کورتەیەکی دەربارەی سەردانی شاندی حکومەتی هەرێمی کوردستان بە سەرۆکایەتی سەرۆک وەزیران بۆ وڵاتی قەتەر و بەشداریکردن لە کۆنفرانسی ئاسایشی میونشن خستەڕوو.
سەرۆک وەزیران ئاماژەی بەوەدا کە لە هەموو دیدارەکانماندا "هەڵوێستی هەرێمی کوردستانمان دەربارەی هەموو بابەتە پەیوەندیدارەکان ڕوونکردەوە و جەختمان لەوە کردەوە، کە هەرێمی کوردستان فاکتەرێکی گرنگی ئاسایش و سەقامگیرییە لە ناوچەکەدا."
لە دوا بڕگەی کارنامەی کۆبونەوەکە، ئەنجومەنی وەزیران ڕەشنووسی ڕۆژمێری کشتوکاڵی لە هەرێمی کوردستان پەسەندکرد کە لە لایەن بێگەرد تاڵەبانی وەزیری کشتوکاڵ و سەرچاوەکانی ئاو خرایەڕوو.
