ئه‌میندارى دارایى یه‌كێتیی تۆپى پێى كوردستان ئاشكرایده‌كات له هه‌فته‌ى داهاتووه ، ته‌واوى شایسته داراییه‌كانى ناوبژیوانان و سه‌رپه‌رشتیارانى خوله‌كانى كوردستان خه‌رج ده‌كرێت .
بەپێی ڕاپۆرتی زایەڵە، عه‌دنان عه‌بدولره‌حمان ئه‌میندارى دارایی یه‌كێتیی تۆپى پێى كوردستان له لێدوانێكى رۆژنامه‌وانى ئاشكرایكرد ، سەرەتای هەفتەی داهاتو شایستە داراییەکانی سەرپەرشتیاران و ناوبژیوانانی خولەکانی تۆپی پێ و فوتساڵی کوردستان دابەش دەکرێت و ره‌زامه‌ندى خه‌رجكردنى پاره‌كه‌یان له حكومه‌ت وه‌رگرتووه .
عه‌دنان عه‌بدولره‌حمان ده‌ڵێت، سوپاس بۆ هەڵویست و خۆراگری دڵسۆزان، هەموو ئەو كه‌سانه‌ى کە درێغیان نەکرد لە هەوڵ و کۆشش تا رەزامەندی درا لە سەر خەرجی بودجەکە.
به‌هۆى پێنه‌دانى شایسته داراییه‌كانیان له سه‌ره‌تاى وه‌رزى ئه‌مساڵه‌وه ، ناوبژیوانان هه‌ڕه‌شه‌ى بایكۆتكردنى خوله‌كانیان كرد، رۆژى دووشه‌ممه‌ش سه‌رۆكى یه‌كێتیی تۆپى پێى كوردستان له كۆنگره‌یه‌كى رۆژنامه‌وانى هۆشدارى دا ئه‌گه‌ر تاوه‌كو رۆژى شه‌ممه حكومه‌ت هاوكارییان نه‌كات ته‌واوى خوله‌كانیان راده‌گرن .
