زایەڵە - لەلایەن حكومەتی بەغداوە بەمەبەستی قەرەبووكردنەوەی هاوڵاتیانی هەرێمی كوردستان ،بڕی ٥٠١ ملێۆن دینار گەیشتە هەرێمی كوردستان و سێشەممە ٥/٧/٢٠٢٢ دەست بە دابەشكردنی پارەكە دەكرێت .
تارا ئەنوەر قەرەداغی بەڕێوەبەری گشتی دەستەی داواكانی موڵكداری ڕایگەیاند، بۆ قەرەبووكردنەوەی ئەو هاوڵاتیانەی لەسەردەمی ڕژێمی پێشووی عیراق موڵكەكانیان دەستی بەسەرگیراوە و لەدەستیان داوە لەشارەكانی هەرێم لەلایەن لێژنەی دادوەری دەستەكەمانەوە داوایان پێشكەشكردوە و ئێستاش پلەی كۆتایی وەرگرتووە و قەرەبوودەكرێنەوەو ٤٧كەسن سوودمەند دەبن لەم قەرەبووكردنەوەیە .
وتیشی، بە ئامانجی قەرەبووكردنەوەیان بڕی٥٠١ ملیۆن دینار لە بەغداوە گەیشتۆتە هەرێم و سێشەممە و چوارشەممە بەسەر ئەو هاوڵاتیانە دابەش دەكەن و قەرەبوویان دەكەنەوە، ئەم پرۆسەیەش بەردەوام دەبێت .
ئامادەکردنی- کامەران کەریم
