خۆ کوژێک پێش ئەوەی بچێتە بارەگای ئاسایشی نیشتمانی لە کەرکووک کوژرا

بەیانی ئەمڕۆ پێنجشەممە کەسێک بە پشتێنەی بۆمبڕێژکراوە ویستوویەتی بچێتە نێو بارەگای ئاسایشی نیشتمانی لە کەرکووک و خۆی بتەقێنێتەوە، بەڵام لەلایەن پاسەوانانی بارەگاکە تەقەی لێکراوە و تەقیوەتەوە.

بەپێی ڕاپۆرتی زایەڵە، رووداوەکە بەیانی ئەمڕۆ پێنجشەممە 29-04-2021 لە گەڕەکی قۆریەی سەنتەری شاری کەرکووک روویداوە، خۆکوژەکە پشتێنەی بۆمبڕێژکراوی پێوەبووە و ویستوویەتی بچێتە نێو باڵەخانەی ئاسایشی نیشتمانی و خۆی بتەقێنێتەوە، بەڵام پاسەوانەکانی بەر دەرگە تەقەیان لێکردووە و لە دووری 100 مەتر لە دەرگای باڵەخانەکە تەقە لە خۆکوژەکە کراوە و دواتر تەقیوەتەوە.

راگەیاندنی ئاسایشی نیشتمانی لە راگەیێندراوێکدا سەبارەت بە تەقینەوەکە ئاماژەی بەوەداوە "هێزە ئەمنییەکان لە کەرکووک تیرۆریستێکیان کوشت کە پشتێنەی بۆمبی بەستبوو و هەوڵیداوە بچێتە نێو بارەگای ئاسایشی نیشتمانییەوە، بەڵام رێگریی لێکراوە و کوژراوە".

بەپێی ئامارە سەرەتاییەکان دوو کارمەندی ئاسایشی نیشتمانی بە سووکی بریندارکراون.

هێزە ئەمنییەکان لە شوێنی رووداوەکەن و دەستیان بە لێکۆڵینەوە کردووە و تاوەکوو ئێستا ناسنامەی ئەو کەسە دیارنییە و نازانرێت کێیە.