پۆلیسی کەرکووک ئافرەتێکیان دەستگیرکردووە کە تاوانبارە بە کوشتنی زاوایەکی خۆی و دواتریش فڕێدانی تەرمەکەی.

بەپێی ڕاپۆرتی زایەڵە، موقەدەم عامر نووری، گوتەبێژی پۆلیسی کەرکووک رایگەیاند، ئافرەتەکە تەمەنی 40 ساڵە و دانیشتووی ناوچەی دۆڕەی پارێزگای سەلاحەددینە، بە سەردانی ھاتووەتە ماڵی زاواکەی لە گەڕەکی عەسکەری لە شاری کەرکووک و شەو کە زاواکەی خەوتووە کوشتوویەتی و تەرمەکەشی فڕێداوە .

گوتەبێژی پۆلیسی کەرکووک ئاماژەی بەوەش کرد، کێشەی نێوان ئەو خەسوو و زاوایە کۆنە و کۆمەڵایەتی بووە، بۆ سەردەمی ئاوارەیی دەگەڕێتەوە و چەند ساڵێکە خەسووەکەی بیر لە کوشتنی ئەو زاوایەی دەکاتەوە و ئامانجی ئەم سەردانەشی ھەر بۆ ئەوە بووە.

کامەران کەریم