محه‌مه‌د شیاع سوودانی سه‌ردانی ئێران ده‌كات
(0) /
زایەڵە - میدیاكانی ئێران بڵاویان كرده‌وه كه هه‌فته‌ی داهاتوو سه‌رۆك وه‌زیرانی عێراق به‌سه‌ردانێك ده‌گاته وڵاته‌كه‌یان و به‌تایبه‌تیش سه‌ردانی پارێزگای خوزستان ده‌كات.
عه‌لی ئه‌كبه‌ڕ حوسێنی پارێزگاری خوزستان ڕایگه‌یاندووه: هه‌فته‌ی داهاتوو محه‌مه‌د شیاع سوودانی سه‌رۆك وه‌زیرانی عێراق سه‌ردانی ئێران و پارێزگاكه‌یان ده‌كات.
سه‌باره‌ت به هۆكاری سه‌ردانه‌كه، عه‌لی ئه‌كبه‌ڕ هیچ زانیارییه‌كی نه‌دركاندووه، به‌ڵام جه‌ختی كردۆته‌وه كه ڕووداوێكی هه‌واڵی گرینگ ده‌بێت بۆ پارێزگای خوزستان و دواتر زانیارییه‌كان له‌سه‌ر سه‌ردانه‌كه به‌فه‌رمی ڕاده‌گه‌یه‌نرێ.
لای خۆیانه‌وه میدیاكانی ئێران باسیان له‌وه كردووه كه ئامانج له سه‌ردانه‌كه‌ی محه‌مه‌د شیاع سوودانی دانانی به‌ردی بناغه‌ی هێڵی شه‌مه‌نده‌فه‌ر و به‌ستانه‌وه‌ی هه‌ردوو پارێزگای به‌سڕه و خوزستانه.
محه‌مه‌د شیاع سوودانی سه‌رۆك وه‌زیرانی عێراق پارساڵیش له كۆتاییه‌كانی مانگی تشرینی دووه‌م سه‌ردانی وڵاتی ئێرانی كردبوو و له‌گه‌ڵ ئایەتوڵڵا سەید ئیبراهیم ڕه‌ئیسی سه‌رۆك کۆماری ئێران و ئایەتوڵڵا سەید عه‌لی خامه‌نیی ڕێبه‌ری باڵای شۆڕشی ئیسلامی ئێران و دیکەی به‌رپرسانی باڵای ئه‌و وڵاته كۆببووه‌وه.
پۆستە پەیوەندی دارەکان:
تێبينى (0):
یەکەم کەس بە بۆ ناردنی تێبینی.
تێبينيێك بنێرە: