زانکۆلاین ٤٨ سەعات درێژکرایەوە

زایەڵە - وەزارەتى خوێندنى باڵا ماوەى (زانکۆلاین) بۆ ٤٨ سەعاتى داهاتوو درێژدەکاتەوە.

وەزارەتى خوێندنى باڵا و توێژینەوەى زانستى لە ڕاگەیەنراوێکدا رایدەگەیەنێت: لەپێناو پێدانى دەرفەتى زیاتر بە دەرچوانى دوانزەى ئامادەیى بۆ ئەوانەى تا ئێستا فۆڕمى (زانکۆلاین) یان پڕنەکردۆتەوە یان تەواویان نەکردوە، بڕیاردرا ماوەى زانکۆلاین (٤٨) سەعاتى دیکە واتە تا سەعات (١٢)ی شەوى رۆژى پێنجشەمە رێکەوتى (2023/9/14) بۆ دەرچوانى قۆناغى دوانزەى ئاماەیی درێژبکرێتەوە.

وەزارەتى خوێندنى باڵا راشیدەگەیەنێت لەپێناو بەرژەوەندى گشتى و پێدانى دەرفەتى زیاتر بە دەرچوانى ئەمساڵ، کە بەهەر هۆکاربێت نەیانتوانیوە فۆرمى زانکۆلاین پڕبکەنەوە، لە ئێستادا دەتوانن سوودمەندبن لەم دەرفەتەو فۆرمى زانکۆلاین تەواو بکەن، هەروەها دەرچوانى خوێندنگە نێودەوڵەتییەکانیش بەهەمان شێوە دەتوانن سود لەم دەرفەتە وەربگرن و لەو ٤٨ سەعاتەدا فۆرمى زانکۆلاین پڕبکەنەوە.

ڕاشیدەگەیەنێت: دەرچوانى ساڵانى ڕابردوش بەتایبەت ئەو دەرچوانەی پێش ساڵی ٢٠١٤ کە ژمارەیان (٧١٩) دەرچوە و ناوی خۆیان لە وەزارەتی پەروەردە تۆمارکردوە و داتاکانیان ئەپلۆدی زانکۆلاین کراوە بەمەبەستی پێشکەش کردنییان بۆ خوێندنی ئێواران، بەهەمان شێوە دەتوانن سود لەم دەرفەتە وەربگرن و لەماوەى ئەم ٤٨ سەعاتەدا فۆڕمى زانکۆلاین پڕبکەنەوە. 

وەزارەتى خوێندنى باڵا راشیدەگەیەنێت: ئەمە دواین دەرفەتەو چیتر ماوەى زانکۆلاین درێژناکرێتەوە، هەر بۆیە داوا لە دەرچوانى قۆناغى دوانزەى ئامادەیی دەکەین، کە تا ئێستا فۆڕمى زانکۆلاین یان پڕنەکردۆتەوە، پێویستە لەماوەى ئەو ٤٨ سەعاتەدا پەلەبکەن و تەواوى هەوڵەکانیان بخەنە گەڕ بۆ پڕکردنەوەو تەواوکردنى فۆرمى زانکۆلاین.

کامەران کەریم