ئیمارات بە بڕی سێ میلیار دۆلار یارمەتی وەبەرهێنانی عێراق دەدات

حکومەتی ئیمارات وەکو دەستپێشخەرییەک بۆ بەهێزکردنی پەیوەندییەکانی لەگەڵ بەغدا، بە بڕی سێ ملیار دۆلار وەبەرهێنان لە عێراق دەکات.

بەپێی ڕاپۆرتی زایەڵە، لە راگەیێندراوێکی فەرمیی هاوبەشی عێراقی – ئیماراتی، هاتووە کە لە کۆبوونەوەی مستەفا کازمی، سەرۆکوەزیرانی عێراق لەگەڵ شێخ محەممەد بن راشد ئالمەکتووم، سەرۆکوەزیرانی ئیمارات و حاکمی دوبەی و شێخ محەممەد بن زاید ئالنهیان، جێنشینی ئەبوزەبی و جێگری فەرماندەی باڵای هێزە چەکدارەکان، هەردوولا رێککەوتن لەسەر گرنگیی پەرەپێدان و بەهێزکردنی هاوکاری لە بوارەکانی ئابووری، گەشەی بازرگانی، زیادکردنی ئاڵوگۆڕی بازرگانی، هاندانی جموجووڵی وەبەرهێنان لەنێوان هەردوو وڵات و داواش لە سەرمایەدار و کارسازانی هەردوو وڵات کرا سەردانی دوولایەنە بکەن و ئەنجوومەنی کارسازیی عێراقی - ئیماراتی دابمەزرێنن.

لەو چوارچێوەیەدا حکومەتی ئیمارات رایگەیاندووە، بە بڕی سێ ملیار دۆلار وەبەرهێنان لە عێراق دەکات، دەستپێشخەرییەکە بە ئامانجی بەهێزکردنی پەیوەندییە ئابوورییەکان و وەبەرهێنان و رەخساندنی دەرفەتی نوێی هاوکاری و هاوبەش و بەرەوپێشبردنی رەوڕەوەی گەشەی ئابووری، کۆمەڵایەتی و پەرەپێدانە.

وەکو لە راگەیێندراوە هاوبەشەکەدا هاتووە، "ئەو هەنگاوە لە چوارچێوەی پەیوەندیی برایەتی مێژووییە کە هەردوو وڵات و گەل کۆدەکاتەوە و سووربوونە لەسەر بەهێزکردنی پەرەپێدانی ئاسۆی ئەو پەیوەندییانە، بەجۆرێک خزمەت بە بەرژەوەندیی هەردوو وڵات بکات".

عێراق ستایشی دەستپێشخەریی ئیماراتی کرد لە دروستکردنەوە و نۆژەنکردنەوەی منارەی حەدبا، مزگەوتی نووری و ژمارەیەک کەنیسە لە پارێزگای نەینەوا. هەروەها هەردوولا باسیان لە پێویستیی هاوکاریی ئەمنی و سەربازی و ئاڵوگۆڕی زانیارییەکان کرد بۆ "بەرەنگاربوونەوەی تیرۆر". هەردوولا رێککەوتن لەسەر فراوانکردنی هاوکارییەکانیان لە بواری وزە، بەتایبەتی لە وزەی پاک.