کەشناسی: پلەکانی گەرما نزمتر دەبنەوە و خێرایی با چالاکتر دەبێت
(0) /
زایەڵە - کەشناسی هەرێم پێشبینییەکانی کەشوهەوای ئەمڕۆ و سبەی راگەیاند و ئاماژەی بەوەکردووە، ئەمڕۆ پلەکانی گەرما نزمتر دەبنەوە و خێرایی با چالاکتر دەبێت. هەر بەهۆی رەشەباشەوە، لە قوتابخانەیەکی ناحیەی قەسرێی و سەر بە چۆمان دەوام راگیرا.
بەڕێوەبەرایەتی گشتی کەشناسی و بومەلەرزەزانی هەرێم رایگەیاندووە، ئەمڕۆ دووشەممە، ئاسمان بەگشتی ساماڵ و پەڵەهەور دەبێت لەگەڵ بوونی رەشەبا تاوەکو کاتەکانی ئێوارە و لە هەندێک ناوچەکانی هەرێم بەتایبەتی لە ناوچەکانی پارێزگای سلێمانی و هەڵەبجە و ئیدارەی گەرمیان.
ئاماژەی بەوەشکردووە، خێرایی با لە ناوچەکانی رەشەبا لەنێوان ٢٠ بۆ ٤٠ کیلۆمەتر دەبێت لە کاتژمێرێکدا و لە هەندێک کاتدا چالاکتر دەبێت بۆ سەرووی ٤٠ کیلۆمەتر.
دەشڵێت، پلەکانی گەرما بە نزیکەی ٤ بۆ ٦ پلەی سیلیزی نزمتر دەبنەوە.
ئەوەش هاتووە، سبەی سێشەممە، ئاسمان نیمچەهەور دەبێت بۆ هەوری تەواو بەتایبەتی لەناوچە شاخاوییەکاندا و پلەکانی گەرما بە ١ بۆ ٢ پلە بەرز دەبنەوە بەراورد بە تۆمارکراوەکانی ئەمڕۆ و خێرایی با لەنێوان ١٠ بۆ ٢٠ کیلۆمەتر دەبێت لە کاتژمێرێکدا.
هەر بەهۆی رەشەباشەوە، قوتابخانەی قەسرێی بنەڕەتی تێکەڵاو لە لاپەڕەی فەرمی خۆی لە تۆڕی کۆمەڵایەتی فەیسبووک رایگەیاند، "بەهۆی هەڵکردنی بای بەهێز و وشک و ساردەوە دەواممان راگرت."
بەرزترین پلەکانی گەرمای پێشبینیکراو بە پلەی سیلیزی
هەولێر : ١٤
سلێمانی :١٠
دهۆک : ١٣
زاخۆ : ١٤
هەڵەبجە :١١
کەرکوک :١٧
سۆران :٩
حاجی ئۆمەران :٣-
گەرمیان :١٥
تێبينيێك بنێرە: