ئەنجامدانی گەشتی شاخاوانی بۆ سەر شاخی ڕەنگیـن لە لایەن کۆمەڵێک شاخەوانەوە

زایەڵە ـــ کۆمەڵەی هەردەوانیی گەرمیان لەسەر بانگهێشتی  دەستەی شاخەوانی هەڵەبجە بەشداری گەشتێکی کرد بۆ لووتکەی شاخی ڕەنگین.

دەستەی ڕاگەیاندنی گرووپی شاخەوانی گەرمیان ڕایگەیاند:  بە بەشداری دەیان گرووپی شاخەوانی کە لە دەڤەرە جیاوازەکانی کوردستانەوە هاتبوون کۆمەڵەکەمان بەشدار بوو لە گەشتێکی شاخەوانیی بۆ لووتکەی شاخی ڕەنگین و دانانی تابلۆی زانیاری لەسەر لووتکەی شاخەکە کە(2262m) بەرزە لە ئاستی ڕووی دەریاوە.

 بەشی ڕاگەیاندن ئاماژەی دا: ڕەنگین سـەر بە زنجیرەچیای سورێنە و دەکەوێتە پشتی گوندی یاڵانپێ و لە چەمی وشکەناوێی سەرووەوە بۆی دەچیت، لەوەرزی بەهاردا دیمەنێکی تایبەتی و ناوازەی هەیە پڕە لە گژوگیای بەهارەی وەک ڕێواس و بەڕەزە و قنگرو  گوڵە شـلێـر و سوورەهەڵاڵە و شتی تریش.
ڕەنگین شاخێکی سەخت و درێژە دوورمەودایە هەربۆیە ناوی بێکۆدیانی هەورامانی پێبەخشراوە.
هەرچەندە گەشتەکە کەمێک تاقەت پڕوکێن و قورس بوو بەڵام پڕچێژو سەرنج ڕاکێش بوو،بە بۆنەی ئەو دیمەنە ناوازەو دڵڕفێنەی کە هەیەتی و بینینی کۆمەڵێک لە هاوڕێ شاخەوانە دێرینەکانمانەوە،هەروەها ناسینی کۆمەڵێک هاوڕێی نوێ کە بەشداری گەشتەکەبوون.

دەستەی ڕاگەیاندن وتیشی: سپێدەی بەیانی لەکەلارەوە بەرەو هەڵەبجە بەڕێکەوتین،دواتر چووینە شارۆچکەی خورماڵ مزگەوتی گەورەی خورماڵ بوو بەجێژوان و کۆبوونەوەی هاوڕێیانمان لە گرووپەکانی تر،
دواتر بەڕێکەوتین بۆ بناری شاخەکە، کاژێر 8.15 دەستمان بە پیادەڕەوی کرد، و بەرەو لووتکە بەڕێکەوتین نزیکی سەعات دوو گەشتین، شەرەفی داکوتانی یەکێک لە پایەکانی تابلۆکەمان پێبەخشرا، هەندێ وێنەی یادگاریمان چرکاند پاشان بەرەو خوار بەڕێکەوتین لە کاژێر 2.31 هاتینەوە سەر کانیەکەی ڕەنگین و لەوێشەوە بۆ خاڵی کۆتا کە خاڵی دەستپێکیش بوو گەڕاینەوە.
سوپاس و ستایش بۆ پەروەرێنی جیهان بۆ هەموو بەخششەکانی بەتایبەت تەندروستی و سەلامەتی.