شێوازی دابەشکردنی زەوی لە سلێمانی ئاشکرا کرا

زایەڵە - بەڕێوەبەرایەتیی گشتیی شارەوانییەکانی سلێمانی شێوازی پڕکردنەوەی فۆرمی بۆ فەرمانبەران بڵاو کردەوە. وتەبێژەکەیان دەڵێت، لە 45 شارەوانیی سنوورەکەیان زەوی بۆ فەرمانبەران ئامادەکراوە.

 سەرۆکایەتی شارەوانییەکانی سلێمانی لە راگەیێندراوێکدا کە رۆژی دووشەممە 22-07-2024 بڵاوی کردووەتەوە  و نموونەی فۆرمێکی داناوە بەناوی "بەڵێننامە و فۆرمی داواکردنی وەرگرتنی زەوی، تایبەت بە فەرمانبەران".

لە فۆرمەکەدا داواکار دەبێت چەند خاڵێک بە دروستی پڕبکاتەوە کە ئەمانەن:

- ناوی چواری داواکاری زەوی (فەرمانبەرەکە) 
- ناوی چواری دایک 
- شوێنی نیشتەجێبوون بە گوێرەی کارتی زانیاری 
-شوێنی لەدایکبوون 
- باری خێزانی
- ژمارەی ئەندامانی خێزان
- ئەو فەرمانگەیەی کاری لێ دەکات
- ژمارەی ساڵەکانی راژەی بە نووسین و بە ژمارە
- پشتگیریی بەردەوامبوون لە راژەکەی 
- ناوی هاوژین و منداڵەکانی.

 ئاوات دەباخ، وتەبێژی شارەوانییەکانی سلێمانی ڕایگەیاندووە "فۆڕمی وەرگرتنی زەوی دابەشکراوە و ئامانجمان ئەوەیە فۆرمەکان بە دروستی پڕبکرێنەوە و فەرمانبەران بتوانن سوودمەند بن".

 ئاماژەی بەوەشکردووە، لە سنووری شارەوانییەکانی سلێمانی 45 شارەوانی هەن و هەر شارەوانییەک لای خۆیەوە زەوی بۆ دابەشکردن ئامادەکردووە؛ 

 وتیشی: "بەگشتی لە سنووری ئێمەدا نزیکەی 32 هەزار کەس لە وەرگرتنی زەوی سوودمەند دەبن

کامەران کەریم