ئەندامێکی پەرلەمانی کوردستان ئاشکرایکرد،  بەردەوام  لەگەڵ مامۆستایانی وانەبێژاندام تاوەکو دەست کەوتنی مافە  زەوت کراوەکانیان .

سەرچنار  ئەحمەد ئەندامی  پەرلەمانی کوردستان لە وتووێژی  لەگەڵ  پەیامنێری  زایەڵە ڕایگەیاند، لەسەرشەقام و لەناوهۆڵی پەرلەمان هەر لەگەڵتاندام تا مافە زەوتکراوەکانتان وەردەگرنەوە.

بەشداربووم لەخۆپیشاندانی مامۆستایانی وانەبێژی هەڵەبجە و سیدسادق، ئەوان داوای شتێکی مستحیل ناکەن ئەوان ستەملێکراوترین چینی ئەم کۆمەڵگەیەن و داوای دامەزراندن دەکەن کە مافی خۆیانە لە بەرامبەر ئەو خزمەتەی پێشکەشی سێکتەری پەروەردەی دەکەن، ئەوان بندیوارنین، ئەوان نزیکی 21 هەزار مامۆستان کە لە سەرتاسەری هەرێم وانە دەڵێنەوە و کارەکانیان هیچی لە کاری مامۆستای میلاک کەمتر نییە و هەرئەوانیشن %20 ی میلاکیان پڕکردۆتەوە و بایکۆتی ئەوان گرفتێکی گەورە لە پرۆسەی خوێندندا دروست دەکات .

ئەوپەرلەمانتارە وتیشی،  ئێمە ئیمزای 43 پەرلەمانتارمان داوەتە سەرۆکایەتی پەرلەمان کە دانیشتنێکی تایبەتی پەرلەمان سازبکرێت لەسەر یەکلایی کردنەوەی پرسی مامۆستایانی وانەبێژو جەختیش لەسەر داواکارییەکەمان دەکەینەوەو کۆڵنادەین و فشارەکان چڕتر دەکەینەوە تایەکلایی بوونەوەی کەیسی مامۆستایانی وانەبێژو گەڕانەوەی مافەزەوتکراوەکانیان و هەرچیمان پێبکرێت دەیکەین و درێغی ناکەین و لە هەوڵەکانمان بەردەوام دەبین و هەمیشە پشتیوانی مامۆستایانی وانەبێژ دەبین.

سازدانی - کامەران سەیدکەریم