پێکدادان لەنێوان هێزە ئەمنیەکان و ناڕازییان بە ئەنجامی هەڵبژاردنەکان لە بەغدا
(0) /
سەرچاوەکانی هەواڵ باس لە پێکدادن لە نێوان ناڕازییان بە ئەنجامی هەڵبژاردنەکان و هێزە ئەمنییەکان لە بەردەم ناوچەى سەوزی بەغدا دەکەن کە ئەڵۆزی لێکەوتۆتەوە.
بەپێی ڕاپۆرتی زایەڵە، دوانیوڕۆی ئەمرۆ (هەینی) خۆپیشاندان لەبەردەم ناوچەى سەوزی شارى بەغدا دەستیپێکرد و هەر لەبەیانى زووشەوە هێزە ئەمنییەکان لە شەقامەکاندا بڵاوەیان پێکرابوو.
ناڕازییان بە ئەنجامی هەڵبژاردنەکان هەوڵیان دا بچنە ناو ناوچەی سەوزەوە، بەڵام لەلایەن هێزە ئەمنییەکانەوە رێگریان لێکرا و بەو هۆیەشەوە گرژی و ئاڵۆزی لەنێوانیاندا دروست بوو.
خۆپیشاندەران داوای هەڵوەشانەوەى ئەنجامەکانى هەڵبژاردن و دووبارەکردنەوەى هەڵبژاردنەکان دەکەن.
بەشێکی دیکەش داوای ژماردنەوەی دووبارەی دەستى دەنگەکانیان دەکەن.
بە گوێرەی وێنە و ڤیدیۆی بڵاوکراوە لە خۆپیشاندانەکان، هێزە ئەمنییەکان بۆ بڵاوەپێکردنی خۆپیشاندەران گازی فرمێسک ڕێژیان بەکارهێناوە و تەقەیان کردووە.
ڕاپۆرتەکان باس لە برینداربوونی ژمارەیێک لە خۆپیشاندەران دەکەن.
تێبينيێك بنێرە: