وەزارەتى پەروەردەی هەرێمی کوردستان گۆڕانکاریى لەدەوامى قوتابخانەکاندا کرد

وەزارەتى پەروەردە بڕیاریدا هەر وانەیەک پێنج خولەک کەمبکرێتەوە بەهۆى هاتنى مانگى رەمەزانەوە و ناوەندەکانی خوێندن نابێت گۆرانکاری لە خشتەی وانەکان بکەن. 

بەپێی ڕاپۆرتی زایەڵە لە راگەیەنراوێکى وەزارەتى پەروەردە، دەوامی بەیانیان کاتژمێر(۸:۰۰)دەستپێدەکات و هەر وانەیەک پێنج خولەک کەم دەکرێتەوە، دەوامی نێوەرۆیان کاتژمێر( ١٢:١٥) دەستپێدەکات و هەر وانەیەک پێنج خولەک کەم دەکرێتەوە. 

دەقى راگەیەنراوەکە: 

ڕاگەیەندراوێک لە وەزارەتی پەروەردەی حکومەتی هەرێمی کوردستانەوە 

پیرۆزبایی هاتنەوەی مانگی رەمەزانی پیرۆز لەسەرجەم موسڵمانان دەکەین، وەزارەتی پەروەردە لەمانگی رەمەزاندا بریاریدا کە دەوام لە ناوەندەکانی خوێندن بەم شێوەیە دەبێت : 

١- دەوامی بەیانیان کاتژمێر(۸:۰۰)دەستپێدەکات و هەر وانەیەک پێنج خولەک کەم دەکرێتەوە . 

٢- دەوامی نێوەرۆیان کاتژمێر( ١٢:١٥) دەستپێدەکات و هەر وانەیەک پێنج خولەک کەم دەکرێتەوە . 

٣- دەوامی قوتابخانە و خوێندنگەکانی ئێواران کاتژمێر (٤:٣٠) دەستپێدەکات، ئەو ناوەندانەی خوێندیش کە پێش بانگی ئێوارە بۆیان نەگونجا دەکرێت کاتژمێر (٧:٣٠ )دەست پێ بکەن. 

بەهەمان شێوەی دەوامی بەیانیان و نێوەرۆیان پێنج خولەک لە وانەکانیان کەم دەکرێتەوە. 

٤- ناوەندەکانی خوێندن نابێت گۆرانکاری لە خشتەی وانەکان بکەن، هەر مامۆستایەک کە کۆتا وانەی تەواو بوو بەئاگاداری بەڕێوەبەر دەتوانێت ناوەندی خوێندن بەجێبهێڵێت. 

‌ وەزارەتی پەروەردە ‌ ۱ی٤ی۲۰۲۲