وەزیری نەوتی عێراق رایدەگەیەنێت؛ ناکرێت دوو سیاسەتی نەوت لەیەک وڵاتدا هەبێت و پرسی وزە بە سیاسی بکرێت، دەشڵێت: بەرەو ئەوە دەچین بڕیارەکەی دادگای فیدراڵی جێبەجێ بکەین.
بەپێی ڕاپۆرتی زایەڵە، ئیحسان عەبدولجەبار وەزیری نەوتی عێراق لە کۆبونەوەیەکیدا لەگەڵ ژمارەیەک لە بەرپرسانی وەزارەتەکەی، رایگەیاند: ئێمە نامانەوێت پرسی نەوت قۆرخ بکەین، بەڵکو مەبەستمانە بیخەینە خزمەتی خەڵکەوە، بۆیە ناکریت دۆخی نەوت و وزە بەم شێوەیە بەردەوامی پێبدرێت.
لەبارەی بڕیارەکەی دادگای فیدڕاڵی لەسەر نەوتی هەرێم، وەزیری نەوت وتی:” بەرەو ئەوە هەنگاو دەنێین بڕیارەکەی دادگای فیدراڵی جێبەجێ بکەین، چونکە ناکرێت لەو بێمتمانەییەدا بمێنینەوە و بڕیارەکە جێبەجێ نەکەین”.
وەزیری نەوت دەشڵێت: دەزانین لە حاڵەتی جێبەجێکردنی بڕیارەکەی دادگای فیدراڵی روبەڕوی لێکەوتەی ناوخۆیی و دەرەکی دەبینەوە، بەڵام بڕیارەکە وەکوخۆی جێبەجێ دەکەین.
وتیشی: دەستپێشخەری زۆرمان کردوە و نەرمی زۆرمان نواندووە، بەڵام سودی نەبووە، پرسی نەوت پرسێکی گشتییە و پەیوەندی بەژیانی خەڵکەوە هەیە بۆیە ناکرێت بەسیاسی بکرێت.
ئەوە لە کاتێکدایە، رۆژی 15ی نیسانی 2022، دادگای فیدڕاڵی عێراق، بڕیاریدا كه‌ یاسای نه‌وت و غازی هه‌رێمی كوردستان ده‌ستوری نییه‌ و سه‌رپێچی ده‌ستوری فیدڕاڵییه‌.
بەپێی بڕیاره‌كه‌ی دادگای فیدڕاڵی، حكومه‌تی هه‌رێمی كوردستان پابه‌ند ده‌كرێت به‌ راده‌ستكردنی ته‌واوی داهاته‌كانی نه‌وت به‌ حکومەتی ناوەندی.
لە بڕیارەکەی دادگای فیدڕاڵیدا ئەوەش هاتووە، حكومه‌تی هه‌رێمی كوردستان پابه‌ند كراوه‌ كه‌ وه‌زاره‌تی نه‌وت و دیوانی چاودێری دارایی عێراق چاودێری ته‌واوی گرێبه‌سته‌كانی فرۆشتنی نه‌وت و گاز بكه‌ن.
حکومەتی هه‌رێمی كوردستان له‌ ساڵی (2014)ـه‌وه،‌ به‌شێوه‌یه‌كی سه‌ربه‌خۆ ده‌ستیكردوه‌ به‌ فرۆشتنی نه‌وت، دوای ئه‌وه‌ی په‌یوه‌ندییه‌كانی نێوان هه‌ولێر و به‌غدا تێكچون.
هەرێمی کوردستان، بەشێوەیەکی سەرەکی پشت بە داهاتی فرۆشی نەوت دەبەستێت و بەپێی داتاکانیش لە ئێستادا هەرێمی کوردستان (450) هەزار بەرمیل نەوتی رۆژانە رەوانەی دەرەوە دەکات.