بافڵ جەلال تاڵەبانى: دەرگای حزب و ئۆرگانەكانمان بەڕووی ژناندا دەکەینەوە
(0) /
زایەڵە - بافڵ جەلال تاڵەبانى، سەرۆکى یەکێتیى نیشتیمانیى کوردستان رایگەیاند "یەكێتیی نیشتمانیی كوردستان هەمیشە پاڵپشت و پشتیوانی ژنان بووە و شانازیشی پێوەدەكات".
لەپەیامێکدا بەبۆنەى 8ى مارس رۆژى جیهانیى ژنان، بافڵ جەلال تاڵەبانى، سەرۆکى یەکێتى ئاماژە بەوە دەکات "ژنانی كورد ئازا و رچەشكێن بوون لە خەبات بۆ بەدیهێنانی ماف و ئازادی، قوربانیی زۆریان بەخشیوە لەپێناو یەكسانیی كۆمەڵایەتی و وەستانەوە دژی جیاكاریی رەگەزی".
دەشڵێت "ئێستاش بە خۆشحاڵییەوە رۆڵێكی كاریگەر لە بوارەجیاوازەكانی كۆمەڵگەدا دەگێڕن و بەشداریی فراوانیان هەیە لە ناوەندەكانی بڕیاردا".
سەرۆکى یەکێتى لەپەیامەکەیدا باس لە رۆڵى ژنانى کورد دەکات لە مێژوودا و ئاماژە بەوە دەکات " مێژووی ژنانی كوردستان لە خەبات و شۆڕشە جیاوازەكانی گەلی كورددا هێندە زێڕین و درەوشاوەیە، كە بۆ هەمیشە بە پێزانین و قەرزاربارییەوە لەئاست گەورەیی و خۆڕاگرییاندا سەری رێزمان دادەنەوێنین و بەشانازییەوە یادیان دەكەینەوە".
دەشڵێت "یەکێتى لە رابردوودا چۆن پارێزەر و بەدیهێنەری مافەكانی ژنان بووە، لەداهاتووشدا زیاتر جەختیلێدەكەینەوە و دەرگای حزب و ئۆرگانەكانمان بەڕوویاندا دەكەینەوە تاوەكو رۆڵی خۆیان بگێڕن و بەشداریی چالاكانەیان لە بوارە جیاوازەكانی كۆمەڵگەدا هەبێت".
هۆشداریشدەدات "دەستبردن بۆ ماف و ئازادییەكانی ژنان هێڵی سوورە و رێگەنادەین بە هیچ بیانوویەك و لەژێر هیچ ناوێكدا مافەكانیان زەوت بكرێت".
تێبينيێك بنێرە: