عومرەكارێكی هه‌رێمی کوردستان لە سعودیە گیانی لەدەست دا

زایەڵە - ئافرەتێکی عومرەکاری کورد بەناوی "سینام ئیسماعیل فه‌تاح"  لە سعوودیە کۆچی دوایی کرد.  

بەڕێوەبەرایەتی گشتی حەج و عومرەى  هه‌رێمی کوردستان ئه‌مڕۆ شه‌ممه‌، 19ی تشرینی دووه‌می 2022،  له‌ راگه‌یه‌ندراوێكدا گوتی: ئەمڕۆ ئافرەتێکی عومرەکاری کورد بەناوی "سینام ئیسماعیل فه‌تاح" تەمەن 68 ساڵ و خەڵکی شارۆچکەی پیرمام له‌ سعوودیه‌ كۆچی دواییكرد.

راشیگه‌یاندووه‌؛ ئه‌و ئافره‌ته‌ ماوەی چەند رۆژێک بوو بە مەبەستی ئەنجامدانی سوونەتی عومرە سەردانی عەرەبستانی سعوودیەی کردبوو.  

له‌ راگه‌یه‌ندراوه‌كه‌دا هاتووه‌: دوێنێ ئەو عومرەکارە بە هۆی تووشبوونی بە جەڵتەی دڵ رەوانەی نەخۆشخانەی مەلیک فەیسەڵ کراوە لە شاری مەککەی پیرۆز و هەموو رێککارە تەندروستییەکانی بۆ ئەنجامدراوە، به‌ڵام بەداخەوە ئەمڕۆ کۆچی دوایی کرد.  

ئاماژه‌ به‌وه‌شدراوه‌، دوای وەرگرتنی رەزامەندی کەسوکارییان بڕیارە لە حەرەمی پیرۆزی مەککەی نوێژی لەسەر بکرێت و پاشان لە گورستانی مەککە بە خاک بسپێردرێت.  

له‌ كۆتایی راگه‌یه‌ندراوه‌كه‌دا هاتووه‌: ئێمە لە بەڕێوەبەرایەتی گشتی حەج و عومرەی هه‌رێمی كوردستان بەناوی بەڕێوەبەری گشتی حەج و عومرەی هەرێمی کوردستان و سەرجەم بەڕێوەبەر و فەرمانبەرانەوە سەرەخۆشی خۆمان ئاڕاستەی کەسوکاری ئەو عومڕەکارە دەکەین و  داواکارین لە خوای گەورە جێگای بە بەهەشتی بەرین شاد بکات و سەبووریش بە کەسوکارەکەی بدات.