قوباد تاڵەبانی: ئێستا کاتی ئەوە نییە خۆمان بە پاڵەوان دەرخەین

زایەڵە - قوباد تاڵەبانی، جێگری سەرۆکوەزیرانی هەرێمی کوردستان دەڵێت "لەم بارودۆخەی ئێستادا، چ لەڕووی یاساییەوە بێت، چ لەڕووی دەسەڵاتەکانی حکومەتی فیدرالییەوە بێت، رێگایەکی تر لەبەردەم حکومەتی هەرێمدا نەبووە جگە لە رێککەوتن و رەزامەندی لەسەر فرۆشتنی نەوتی هەرێمی کوردستان لەڕێگای کۆمپانیای سۆمۆوە".

تاڵەبانی ئەوەشی ئاماژە پێداوە "ئەگەر چی دەبوو پێشتر و بەڕەزامەندی خۆمان ئەم کارەمان بکردایە، نەک دوای بڕیاری دادگا نێودەوڵەتییەکان، بەڵام ئێستاش هەر بەهەنگاوێکی دروستی دەزانین لەپێناو دەستپێکردنەوەی هەناردەکردنی نەوتی هەرێمی کوردستان و چارەسەرکردنی یەکجاری ئەم کێشەیە لەداهاتوودا".

بەوتەی قوباد تاڵەبانی "وەک پێشتر لەچەندین بۆنەدا جەختمان کردووەتەوە؛ گرنگ نییە کێ نەوت دەفرۆشێت، گرنگ ئەوەیە بتوانین موچەی مووچەخۆران دابین بکەین و خزمەتگوزاری پێویست پێشکەش بکەین و لەهەمانکاتدا هەنگاو بنێین بەرەو رێککەوتن لەسەر یاسای نەوت و گاز و پەسندکردنی یاسای بودجە و گێڕانەوەی سەقامگیری ئابوری لە هەرێمی کوردستان".

وتیشی: "ئێستا کاتی ئەوە نییە خۆمان بە پاڵەوان دەرخەین، کاتی ئەوەیە دان بەهەڵەکانماندا بنێین بۆ ئەوەی بەڕوونی گرفتەکان ببینین و چارەسەریان بکەین لەپێناو خۆشگوزەرانی کۆمەڵانی خەڵکی کوردستان. ئێستا کاتی ئەوەیە ئەو نیازپاکییەی ئێستا هەیە وەک دەرفەتێک بقۆزینەوە هەموو لایەکمان هەوڵ بدەین یاسای نەوت و گاز و یاسای بودجە بە باشترین شێوە و لە نزیکترین ماوەدا پەسند بکرێت".

رایدەگەیەنێت "هەرێمی کوردستان لە ماوەی نزیکەی دە ساڵی رابردوودا زیانی گەورەی بەرکەوت، گەشەی ئابوری و بەشێکی زۆری پڕۆژەکان وەستان، پێدانی موچەی موچەخۆران تووشی گرفت بوو، لەو ماوەیەدا بەهۆی ناسەقامگیری و نەبوونی بەرچاوڕوونی لە داهات"،

دەشڵێت هەرێمی کوردستان بەبێ یاسای بودجە بەڕێوەچووە، هەموو ئەمانەش هۆکاربوون بۆ کەمبوونەوەی متمانەی هاوڵاتیان بە دامەزراوەکان، بۆیە لەمەودوا هیچ بیانوویەک نامێنێت لەبەردەم پەسەندکردنی بودجەیەکی شەفاف لەلایەن پەرلەمانی کوردستانەوە".

دەڵێت "لە ئێستا بە دواوە و لە دوای ئەم رێککەوتنە، گەشبینین هەموو لایەکمان بە ئەزمون وەرگرتن لە رابردوو هەوڵەکانمان چڕبکەینەوە بۆ بونیادنی حکومڕانییەکی دروست و متمانەی هاوڵاتیان بە دامەزراوەکان بەهێز بکەینەوە."

جێگری سەرۆکوەزیرانی هەرێمی کوردستان ئەوەی نوسیوە "پڕۆژە خزمەتگوزارییەکان وەگەربخەینەوە، لە چوارچێوەی یاسای بودجەدا شەفافییەت پەرە پێ بدەین و دادپەروەری لە دابەشکردنی داهات و خزمەتگوزارییەکان لەنێوان هەموو پارێزگاکاندا بەبێ جیاوازی دابین بکەین".

ئاشکرایکردووە لە دوای نزیکەی دە ساڵ قەیران و ناخۆشی، ئێستا دەرفەتێکی زێڕین هاتووەتە ئاراوە، پێشتر زۆرجار دەرفەتەکان لەباردەچوون، هەربۆیە دەبێت هەموو لایەکمان بەرپرسیارانە مامەڵە لەگەڵ ئەم دەرفەتەدا بکەین، نەک هەر نەهێڵین لەبار بچێت، بەڵکو بیقۆزینەوە بۆ راستکردنەوەی هەڵەکانی رابردوو و گەڕاندنەوەی هیوا بۆ کۆمەڵانی خەڵکی کوردستان.