هێرش کرایە سەر فڕۆکەخانەی نێودەوڵەتی هەولێر

بەپێی ڕاپۆرتی زایەڵە، دژە تیرۆری هەرێم ڕایگەیاند موشەکێک ئاراستەی فڕۆکەخانەی نێودەوڵەتی هەولێر کراوە.

وەزارەتی ناوخۆی هەرێمی کوردستان راگەیێندراوێکی لەبارەی هێرشەکەی سەر فڕۆکەخانەی هەولێر بڵاوکردەوە و دەڵێت، "دوای لێکۆڵینەوە و بەدواداچوونی دەزگا پەیوەندیدارەکان بۆ هۆکاری تەقینەوەی ئەمشەوی فڕۆکەخانەی نێودەوڵەتیی هەولێر، دەرکەوت هێرشەکە لەڕێگەی درۆنی TNT کراو بووە و ئاراستەی بنکەی هێزەکانی هاوپەیمانان کراوە لەناو فڕۆکەخانە".

هەر لە راگەیێندراوەکەدا هاتووە، "خۆشبەختانە هیچ زیانێکی گیانی نییە و تەنیا زیانی ماددی بەر باڵاخانەیەک کەوتووە. لێکۆڵینەوەکانیش بەردەوامن بۆ دیاریکردنی سەرچاوە و شوێنی هاتنی درۆنەکە".

بەهۆی هێرشەکە، کونسوڵخانەی ئەمەریکا زەنگی ئاگادارکردنەوەی لێداوە.

ئومێد خۆشناو، پارێزگاری هەولێر راگەیاند، مووشەکەکە لە نزیک هێزەکانی هاوپەیمانان کەوتووەتە خوارەوە.

فڕۆکەکانی هاوپەیمانان بە ئاسمانی هەولێردا دەسوڕێنەوە و ئەو ئاگرەی بەهۆی مووشەکەکە کەوتبووەوە، کوژێندراوەتەوە.

هاوکات هێرشێکى مووشەکى لە ناحیەی زێلکانەی سەر بە قەزای شێخان کرایە سەر بنکەیەکی سەربازی تورکیا.