پارتی، ئومێد خۆشناوی بۆ پارێزگاری هەولێر كاندید كرد

لەلایەن پارتی دیموكراتی كوردستانەوە، ئومێد خۆشناو سەرۆكی ئێستای فراكسیۆنی زەرد لەپەرلەمانی كوردستان، بۆ پارێزگاری هەولێر كاندید كرا.

بەپێی هەواڵی زایەڵە، سەرچاوەیەك لە نوسینگەی ئومێد خۆشناوەوە هەواڵەكەی پشتڕاست كردەوە و راگەیاند، لەچەند رۆژی داهاتوو بە فەرمی ناوی ئومێد خۆشناو ئاراستەی ئەنجومەنی پارێزگای هەولێر دەكرێت بۆ پەسەند كردن  و دەستبەكاربوونی.

پێشتریش سەرۆکی ئەنجومەنی پارێزگای هەولێر رایگەیاند، کە مەسعود بارزانی سەرۆكی پارتی  بڕیار دەدات و  کەسێک بۆ پارێزگاری هەولێر دیاری دەکات.

رۆژی ١٨ی مانگی ١١، فرسەت سۆفی پارێزگاری هەولێر دوای ماوەیەک لە توشبوونی بە کۆرۆنا و بردنە دەرەوەی بۆ چارەسەر، لە شاری ئەنقەرەی وڵاتی تورکیا لە تەمەنی ٤٢ ساڵیدا کۆچی دواییکرد و لەو کاتەوە پۆستی پارێزگاری هەولێر بە وەکالەت بەڕێوەدەبرێت.