تەندروستی جیهانی: کۆرۆنا بەرەو کۆتایی دەچێت

وتەبێژی رێکخراوی تەندروستی جیهانی رایگەیاند، لەئێستادا ئاماژەی ئەرێنی هەیە کەئەمساڵ ڤایرۆسی کۆرۆنا بەرەو کۆتایی دەچێت، بەومەرجەی پابەندبون بە پاک و خاوێنی و خۆپارێزی بەئاستێکی بەرز بەردەوام بێت.

بەپێی هەواڵی زایەڵە، مارگرێت هاریس، وتەبێژی رێکخراوی تەندروستی جیهانی بەئاژانسی بی بی سی راگەیاندوە، "ئەوەی گرنگە لەئێستادا پارێزگاریکردنە لەکەمکردنەوەی رێژەی توشبون بەکۆرۆنا ئەویش لەرێگەی وەرگرتنی ڤاکسین و هەڵسوکەوتی هاوڵاتیان لەپابەندبونی رێنماییەکان و درکردن بە مەترسی پەتاکە".

ئاماژەی بەوەشکردوە، ڤاکسینی کۆرۆنا کاریگەری نابێت ئەگەر رێژەی توشبون بە پەتاکە بەرەو کەمبونەوەی نەچێت، بەڵام لەگەڵ بەردەوامی کەمبونەوەی ئامارەکان "دەتوانین بڵێین مرۆڤایەتی بەسەر ئەو پەتایەدا سەرکەوتنی بەدەستهێناوە".

تائێستا لەجیهان زیاتر لە 85 ملیۆن و 520 هەزار کەس توشی کۆرۆنا بون و زیاتر لە ملیۆنێک و 850 کەسیش بەهۆی کاریگەری پەتاکە گیانیان لەدەستداوە، هاوکات وەرگرتنی ڤاکسینی کۆرۆنا ئومێدی ئەوەی لای مرۆڤایەتی و دەسەڵاتدارانی تەندروستی دروستکردوە کە لەم ساڵدا پەتاکە بەرەو کۆتایی بچێت.