بەڕێوەبەرایەتی چاککردنەوە و پاراستنی ڕێگاوبانی گەرمیان دەکرێتەوە
(0) /
زایەڵە - ئیدارەی گەرمیان ڕایگەیاند، ئەمڕۆ (٨ی ئایار) لیژنەیەکی باڵای وەزارەتی ئاوەدانکردنەوەی حکومەتی هەرێم بەمەبەستی دەستبەکاربوونی بەڕێوەبەرایەتی چاککردنەوە و پاراستنی رێگاوبانەکانی گەرمیان سەردانی ئیدارەی گەرمیانی کرد و سەرپەرشتیاری ئیدارەی گەرمیان لەکۆبونەوەیدا لەگەڵیان، پشتیوانی بۆ کردنەوەی بەڕێوەبەرایەتیەکە و پەرەپێدانی کارەکانی دوپاتکردەوە.
لەو سەردانەدا، توانا بەشیر بەڕێوەبەری گشتی دیوانی وەزارەتی ئاوەدانکردنەوە و سەرۆکی لیژنەکە ئەوەی خستەڕوو، لەلایەن وەزارەتەکەیانەوە فەرمانی کردنەوەی بەڕێوەبەریەتی چاککردنەوە و پاراستنی رێگاوبانی گەرمیان دەرچووە، ئەمڕۆ هاتوون بۆ رێکخستنی کارەکانی بەڕێوەبەرایەتیەکە و گرتنەبەری رێکارەکانی دەستبەکاربوونی.
لای خۆیەوە، جەلال شێخ نوری سەرپەرشتیاری ئیدارەی گەرمیان، ئەوەی خستەڕوو، بوونی ئەو بەڕێوەبەڕێوەبەرایەتیە بۆ گەرمیان گرنگە و خزمەت بە سنورەکە دەکات، ئێمە لە ئیدارەی گەرمیان هاوکار و پشتیوان دەبین بۆ کردنەوە و پەرەپێدانی کارەکانی بەڕێوەبەرایەتیەکە.
هاوکات هەر لە کۆبونەوەکەدا، کە جێگری سەرپەرشتیاری ئیدارەی گەرمیان ئامادەی بوو، بەڕێوەبەری گشتی رێگاوبانی سلێمانی و بەڕێوەبەری بەڕێوەبەرایەتیەکانی وەزارەتی ئاوەدانکردنەوە لەگەرمیان، ئامادەییان پیشاندا بۆ هاوکاریکردنی بەڕێوەبەرایەتی چاککردنەوە و رێگاوبانی گەرمیان لە دابینکردنی میلاک و پێداویستیەکانی.
کامەران کەریم
تێبينيێك بنێرە: