زایەڵە - مەسعود بارزانی سەرۆکى پارتى دیموکراتى کوردستان (پارتی) داوای گفتوگۆ لەگەڵ بەغداد دەکات لەبارەی بڕیارەکانی دادگای فیدراڵیەوە سەبارەت بە دۆسییەى نەوتى هەرێم.
بەپێی راگەیەنراوێکى بارەگاکەی، مەسعود بارزانی ئەمرۆ یەكشەممە لە سەلاحەددین پێشوازی لە مارك برایسن ڕیچاردسۆن باڵیۆزی بریتانیا لە عێراق كرد.
لە دیدارەكەدا كە دێڤید هانت كونسوڵی بریتانیا لە هەولێر ئامادەی بوو هەنگاوەكانی ناو پڕۆسەی سیاسیی عێراق و تەحەددیات و ئاستەنگەكانی بەردەم پێكهێنانی حكوومەتی تازەی عێراق تاوتوێ كرا.
هەر لەو دیدارەدا باس لە بڕیارەكانی دادگەی فیدڕاڵیی عێراق کراوە و بارزانی جەختی لەوە كردەوە كە پابەندبوون بە دەستوور و گفتوگۆ چارەسەری گرفت و قەیرانەكانی عێراقە.
پەیوەست بە بارودۆخی سیاسیی هەرێم و مافی پێكهاتەكانی هەرێمی كوردستان، سەرۆکى پارتى پابەندبوونی خۆی بەرانبەر پاراستنی مافی هەموو پێكهاتەكانی هەرێمی كوردستان دووپاتكردەوە.
پەیوەندییەكانی نێوان هەرێمی كوردستان و بریتانیا تەوەرێكی تری ئەو كۆبوونەوە بوو و باڵیۆزی بریتانیا لە عێراق پابەندبوونی وڵاتەكەی بە ئەنجامەكانی سەردانی سەرۆكی حكوومەتی هەرێم بۆ بریتانیا و پەرەپێدانی پەیوەندییەكانی نێوان هەردوولا دووپاتكردەوە.

یەکەم کەس بە بۆ ناردنی تێبینی.

مەسعود بارزانی داوای گفتوگۆ لەگەڵ بەغداد لەسەر بڕیارەکانی دادگای فیدراڵ دەکات