زایەڵە - ئازاد ئیبراهیم ئەحمەد نوسەر و ڕۆژنامەنوس جەختی لەسەر ئەوە کردەوە؛ "ئەم حزبانەی دەسەڵات، پێشتر ئەزموونی ئۆپۆزسیۆنبوونیان تاقیکردۆتەوەو لەم مۆدێلەی ئێستا ناترسن، بریا کورد خاوەنی ئۆپۆزسیۆنێکی راستەقینەی کارا بوایە کە دەسەڵاتی لەخەوی غەفڵەت بەئاگا بهێنایە."
ئازاد ئیبراهیم ئەحمەد نوسەر و ڕۆژنامەنوس بەزایەڵەی ڕاگەیاند: ئەحمەد چەلەبی وەک زۆرێکی دیکەی سیاسییەکانی عیراق، سیاسییەکی زەبزەبییە، لەپێش پڕۆسەی ئازادی عیراقدا بووە سەرۆکی بەرەیەک بەناوی (کۆنگرەی نیشتمانیی عیراق)، ناوەکەی زیاتر  لە کۆبوونەوەی هێزە ئۆپۆزسیۆنەکانی عیراق وەرگرتبوو کە 1992 لە سەلاحەدین بەسترا، بەڵام پاشخانەکەی بۆ راپەڕینی دانیشتوانی عیراق دژی رژێمی سەدام حسێن دوای بڕانەوەی جەنگی کەنداوی 1991، دەگەڕایەوە.لەساڵی 1999 لەدەرەوەی وڵات کۆنگرەیەکی بەست و ئەنجومەنێکی نوێی پێکهێنا، دوو هێزە ئۆپۆزسیۆنەکەی کوردستان یەکێتی و پارتی لە کۆنگرەکەی کشانەوە، حزبی کۆمۆنیستی عیراقی کە ساڵی 1934 دامەزرابوو، بەتەواوی وازیان لە کۆنگرەی نیشتمانی هێنا بەهۆی ناڕوونی لەکارو ویستی چەلەبیدا و پێیانوابوو بۆ دەستکەوتنی ماددی، دەکرێت لەهەموو بیروباوەڕێکی خۆی بکشێتەوە، بۆیە کۆمۆنیستەکان بە چەلەبییان دەوت "معارضەٓ الفنادق و لیس الخنادق" واتە "ئۆپۆزسیۆنی ئوتێلەکان نەک ئۆپۆزسیۆنی سەنگەرەکان".
وتیشی: لەکوردستانیش، ئێستا دەرکەوتەیەک بەناوی ئۆپۆزسیۆن لە کۆشکە سپییە فیرعەونییەکانیانەوە دانیشتوون و ئیستیسمار و بازرگانی بەهەست و بیروباوەڕی گەنجی کوردەوە دەکەن. هێشتا پەرێزی خۆیی لەهەموو ئەو پیسیانە پاکنەکردۆتەوە کە ساڵانێکە لەکایەی ئابووری و بزنسدا تێیکەوتووە، کەچی دەیەوێت بڵێت پیسەکان لەئێمە نین.لە دنیادا نەبووە و نابێت مرۆڤی خاوەن بزنس و پارەی زۆر بەدیدی سیاسی و بێ بەرژەوەندی بڕوانێتە دەسەڵات، ئەمە بۆچوونی کلاوفیتزی ئەمریکییە. مرۆڤی بازرگان و خاوەن بزنس هەمیشە ماکیاڤیللییانە دەڕوانێتە کارو پڕۆژەکان، بڕی سوودی لەلا گرنگە نەک کوالێتی و باشی کارەکە.
باسی لەوەشکرد: کەمال دیب لەکتێبی (بوومەلەرزەیەک لەسەرزەمینی ناتەبایی) دەڵێت "لەئیدارەکەی بۆشی کوڕدا و کاتێک پڕۆسەی ئازادی عیراق دەستی پێکرد، هەموو ئەو کەسانەی دەسەڵاتداربوون، هەر ئەوانەبوون کە خاوەن کۆمپانیا گەورەکانی نەوت و بازرگانی گەورەبوون و گەیشتنە عیراق"، دیب زیاتر دەڵێت "تەنانەت کاتێک ئەمریکا لە فاوەوە گەیشتە بەصرە، کۆمپانیایەکی تایبەتی کوژاندنەوەی بیرە نەوتی لەگەڵ خۆی هێنابوو بۆئەوەی زیان بەر نەوتی عیراق نەکەوێت، ئەمە جگە لەوەی کۆمپانیای بیچتڵ کە ساڵی 1898 دامەزراوە، لەگەڵ خۆیدا گەیاندە عیراق تاکو تەواوی پڕۆژە ئەندازیارییەکان بۆ خۆیان کۆنترۆڵ بکەن.ئەو ئۆپۆزسیۆنەشی ئەمڕۆ لە کوردستان دەیبینین، بەدەرنییە لە دیدی بازرگانی بە سیاسەت و رۆح و جەستەی مرۆڤی کوردەوە، دەیەوێت هەموو پارەکان بۆ خۆی بێت نەک خزمەتەکان ئەو بیکات، ئەم ئۆپۆزسیۆنە کوردییە جیاوازە لەو بازرگان و خاوەن بزنسانەی لەپێناوی پرۆژەی گەورە و لەجەنگی عیراقدا گەیشتنە عیراق، ئەم ئۆپۆزسیۆنە کوردییە لە کۆشکە ئوتێلئاساکانیانەوە دانیشتوون و سیاسەت وەک کۆمپانیایەک دەبینێت کە پەرلەمانتارو دەست و پێوەندەکانی خۆیان داهاتەکەی کۆدەکەنەوە، بەڵام لەپێناوی کۆمپانیاکەیدا نەچووە کەرکوک و بڵێت دەنگ بە کۆمپانیاکەی بدەن.
ئەم مۆدێلە پێشتر لەلای بۆریس جۆنسۆنی بەریتانی و ترامپی ئەمریکیش هەبوو، بەڵام لەبەرئەوەی مۆدێلێکی خراپبوو، هەرزوو شکستیهێنا و بوونە زیان بۆ وڵاتەکانیان.
ئەوەشی خستەڕوو: دواجار دەڵێم: ئەم حزبانەی دەسەڵات، پێشتر ئەزموونی ئۆپۆزسیۆنبوونیان تاقیکردۆتەوەو لەم مۆدێلەی ئێستا ناترسن، بریا کورد خاوەنی ئۆپۆزسیۆنێکی راستەقینەی کارا بوایە کە دەسەڵاتی لەخەوی غەفڵەت بەئاگا بهێنایە، بەڵام پرسیارەکە ئەوەیە: ئەم ئۆپۆزسیۆنە بۆ شتێکی نییە لەسەر داگیرکردنی کوردستان و ئەو لەشکرکێشییەی کە دەکرێتەسەر باشوور و خۆرئاوای کوردستان،بۆ مێژووی ئەم دێڕەشی بۆ زیاددەکەم،ئەم دیاردەیەی ئێستای ئۆپۆزسیۆنی پۆپۆلیستی لەکوردستان، رۆحی ئۆپۆزسیۆنبوونی راستەقینەی کوشت و جارێکیتر کەس بڕوا بە هیچ حزب و هیچ تەیفێکی سیاسی ناکات بەناوی ئۆپۆزسیۆنەوە دەربکەوێت، چونکە ئەمانە ئۆپۆزسیۆنی ئوتێلەکانن نەک سەنگەرەکان.
کامەران کەریم