لە هەرێمی کوردستان بودجەیەکی تایبەت بۆ کڕینی ڤاکسینی کۆرۆنا تەرخان ئەدرێت

وەزیرى تەندروستى هەرێم جەختی کرد حکومەتى هەرێم بودجەیەکى تایبەت بۆ کڕینى ڤاکسینى کۆرۆنا تەرخان دەکات.

بەپێی هەواڵی زایەڵە، وەزیرى تەندروستى هەرێم رایگەیاند،وەک حکومەتى هەرێم گەیشتوونەتە رێککەوتن بۆ کڕینى ڤاکسینى کۆرۆنا و بودجەى پێویستى بۆ دابین دەکرێت.

سامان بەرزنجى وەزیرى تەندروستى حکومەتى هەرێم لە کۆنفرانسێکى رۆژنامەنوانیدا رایگەیاند، لەگەڵ گەیشتنى ڤاکسینى کۆرۆنا بۆ بەغدا پشکى هەرێمى کوردستان دیاریکراوە و دەگاتە دەستیان و لەلایەن لیژنەیەکى پسپۆڕیشەوە پلەبەندى بۆ ئەو کەسانە کراوە، کە ڤاکسینەکەیان پێدەدرێت.

ئاماژەى بەوەشکردوە، لەگەڵ چەند کۆمپانیایەکى بەرهەمهێنەرى ڤاکسین لە گفتوگۆدان بۆ کڕینى راستەوخۆى ڤاکسینەکە، بەڵام ئاسان نییە چونکە بەرهەمهێنانی ڤاکسین زۆر سنووردارە و تەنیا چەند کۆمپانیایەکی نێودەوڵەتی سەرکەوتنیان بەدەستهێناوە.

هەروەها وەزیرى تەندروستى هەرێم روونیشیکردەوە، بڕیارە کۆتایی مانگى دوو بەشى یەکەمى ڤاکسینی دژە کۆرۆنا بگاتە عێراق، بەڵام تا ئێستا روون نییە ئەو کاتە دەگات یاخود نا.