وەزارەتی پەروەردە: بەستنی ماسک ناچارییە

وەزارەتی پەروەردە ڕایگەیاند: بۆ سەلامەتیی مامۆستایان و قوتابیان و خوێندکاران، خۆپارێزیی و بەستنی ماسک بەتەواوی ئیلزامییە
بەپێی ڕاپۆرتی زایەڵە، وەزارەتی پەروەردە ڕایگەیاند، وەک هەموو لایەک ئاگادارن بەهۆی پشووی وەرزی یەکەمی خوێندن و دۆخی کەشوهەوا ماوەیەک ناوەندەکانی خوێندن بە داخراوەیی مابونەوە، لە ئێستاشدا ئامارەکانی توشبوان بە ڤایرۆسی(کۆرۆنا و ئۆمیکرۆن) لە بەرزیدایە، بۆ ئەوەی پرۆسەی پەروەردە و فێرکاری بە باشی بەرێوەبچێت لەوبارەیەوە هەموو لایەک ئاگادار دەکەینەوە :
١- بۆ سەلامەتیی مامۆستایان و قوتابیان و خوێندکاران، خۆپارێزیی و بەستنی ماسک بەتەواوی ئیلزامییە، هەرناوەندێکی خوێندن پابەند نەبوونی تێدابێت پێویستە بەڕێوەبەری پەروەردەی قەزا رێکاری کارگێریی پێویست بگریتەبەر .
٢- داوا لە بەخێوکارانی قوتابیان و خوێندکاران دەکەین کە وەرگرتنی ڤاکسین بۆ قوتابیان و خوێندکارانی  تەمەن (١٢ ساڵ) بەرەو سەرەوە منداڵەکەتان پارێزراوتر دەکات، وەزارەتی پەروەردە هانتان دەدات و کار ئاسانیتان بۆ دەکات بەمەبەستی وەرگرتنی ڤاکسین بەهەماهەنگی لەگەڵ وەزارەتی تەندروستی حکومەتی هەرێمی کوردستان .
٣- بەخێوکاری قوتابیان و خوێندکاران  دەتوانن فۆرمی بەڵێننامەی بەخێوکار بۆ وەرزی دووەم  پربکەنەوە کەدەستەبەری خوێندنی ئۆنلاین یان ئەلیکترۆنی یان پاڵپشتی ماڵەوەیان بۆ قوتابییەکە دەکەن و ئەم مافە رێگەپێدراو دەبێت بۆ پڕکردنەوەی فۆرمی ئاماژەپێکراو تا بەرواری ١٠ی ٢ی ٢٠٢٢.
کامەران کەریم